មន្ត្រីរដ្ឋាភិបាលក្នុងតំបន់បាននិយាយកាលពីថ្ងៃចន្ទ (២៦ ឧសភា) ថា មនុស្សជាង ៣០នាក់ ត្រូវបានសម្លាប់នៅក្នុងការវាយប្រហារដាច់ដោយឡែកពីគ្នាក្នុងប៉ុន្មានថ្ងៃថ្មីៗនេះ នៅភាគកណ្តាលប្រទេសនីហ្សេរីយ៉ា ក្នុងការវាយឆ្មក់ចុងក្រោយបំផុតនៅតំបន់មួយដែលក្រុមអ្នកចិញ្ចឹមសត្វ និងកសិករតែងតែប៉ះទង្គិចគ្នាជុំវិញទំនាស់ដីធ្លី។

ប្រធានតំបន់រដ្ឋាភិបាលក្នុងតំបន់ Gwer West នៃរដ្ឋ Benue លោក Ormin Torsar Victor បានប្រាប់សារព័ត៌មាន AFP ថា ការវាយប្រហារទាំងនោះបានកើតឡើងក្នុងភូមិចំនួន៣ ចន្លោះថ្ងៃសុក្រ និងថ្ងៃអាទិត្យ កាលពីចុងសប្ដាហ៍។ លោកនិយាយថា ថា "មនុស្សមិនតិចជាង ២០នាក់ទេត្រូវបានសម្លាប់នៅភូមិ Aondana កាលពីថ្ងៃអាទិត្យ" ហើយមនុស្សជាង ១០នាក់ទៀត បានស្លាប់នៅក្នុងភូមិមួយដែលនៅជិតខាងនោះ។

អ្នកនាំពាក្យនគរបាលរដ្ឋ Benue បានបញ្ជាក់ពីការវាយប្រហារចំនួនពីរលើកនៅតំបន់នោះ ប៉ុន្តែនិយាយថា ការិយាល័យរបស់ខ្លួនមិនបានទទួល "របាយការណ៍ពីមនុស្ស ២០នាក់" ដែលត្រូវសម្លាប់នោះទេ។

Benue គឺជារដ្ឋមួយក្នុងចំណោមរដ្ឋដែលរងគ្រោះខ្លាំងបំផុតដោយអំពើហិង្សាដ៏បង្ហូរឈាមបែបនេះរវាងអ្នកចិញ្ចឹមសត្វពនេចរ និងកសិករ ដែលស្តីបន្ទោសអ្នកគង្វាលបសុសត្វទាំងនោះ ចំពោះការបំផ្លិចបំផ្លាញដីស្រែចំការយកធ្វើជាចំណីស្មៅរបស់សត្វចិញ្ចឹមពួកគេ៕