របាយការណ៍ថ្មីរបស់ការិយាល័យសិទ្ធិមនុស្សរបស់អង្គការសហប្រជាជាតិ (OHCHR) បានព្រមានកាលពីថ្ងៃចន្ទ (២៦ ឧសភា) ថា វិបត្តិសិទ្ធិមនុស្សដែលចេះតែកើនឡើងរបស់សហភាពមីយ៉ាន់ម៉ា បង្កឡើងដោយអំពើហិង្សាយោធាឥតឈប់ឈរ និទណ្ឌភាពជាប្រព័ន្ធ និងការដួលរលំផ្នែកសេដ្ឋកិច្ច បានធ្វើឱ្យជនស៊ីវិលជាប់ក្នុងវិបត្តិសិទ្ធិមនុស្ស "ដ៏មហន្តរាយ" និងជម្លោះដ៏ឃោរឃៅកាន់តែខ្លាំងក្លាឡើង។

ចេញផ្សាយនៅមុនសម័យប្រជុំរបស់ក្រុមប្រឹក្សាសិទ្ធិមនុស្ស របាយការណ៍នេះបានលើកឡើងពីស្ថានភាពកាន់តែអាក្រក់ទៅ ចាប់តាំងពីរដ្ឋប្រហារយោធាក្នុងឆ្នាំ២០២១ ដែលបានបង្អាក់ដំណើរផ្លាស់ប្តូរលទ្ធិប្រជាធិបតេយ្យរបស់មីយ៉ាន់ម៉ា និងបានបញ្ឆេះការតស៊ូប្រដាប់អាវុធយ៉ាងទូលំទូលាយ។

ក្នុងពេលប៉ុន្មានឆ្នាំមកនេះ កងកម្លាំងយោធាបានកំណត់គោលដៅលើប្រជាជនស៊ីវិល ជាមួយនឹងការវាយប្រហារតាមអាកាស ការទម្លាក់គ្រាប់បែកទ្រង់ទ្រាយធំ និងទម្រង់នៃអំពើហិង្សាផ្សេងទៀត ខណៈក្រុមប្រដាប់អាវុធប្រឆាំងរបបសឹក បានបន្តវាយដណ្តើមយកទឹកដី ជាពិសេសនៅក្នុងរដ្ឋរ៉ាឃីន។

ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក Volker Türk លើកឡើងថា “មីយ៉ាន់ម៉ាបានស៊ូទ្រាំនឹងវិបត្តិសិទ្ធិមនុស្សដ៏មហន្តរាយកាន់តែខ្លាំងឡើង ដោយសារហិង្សា និងអំពើឃោរឃៅផ្សេងទៀត ដែលប៉ះពាល់ដល់គ្រប់ទិដ្ឋភាពនៃជីវិត”។ លើសពីនេះ ជម្លោះដែលកើនឡើងឥតឈប់ បានជះឥទ្ធិពលយ៉ាងធ្ងន់ធ្ងរដល់សេដ្ឋកិច្ចមីយ៉ាន់ម៉ា បង្កការបំផ្លិចបំផ្លាញស្ថានភាពមនុស្សធម៌ដែលអាក្រក់រួចទៅហើយ៕