រដ្ឋបាលរបស់លោកប្រធានាធិបតីអាមេរិក Donald Trump កំពុងប្រឈមនឹងបញ្ហាផ្លូវច្បាប់កាន់តែខ្លាំងឡើងលើគោលនយោបាយពន្ធគយដ៏ធំទូលាយរបស់ខ្លួន ដោយយ៉ាងហោចណាស់មានបណ្តឹងធំៗ ៧ករណី ដែលដាក់ពីគ្រប់ទិសទីដោយបណ្ដារដ្ឋរបស់អាមេរិកផ្ទាល់ ក្រុមអាជីវកម្ម និងបុគ្គលដែលចង់តតាំងនឹងសិទ្ធិអំណាចរបស់ប្រធានាធិបតីរូបនេះ ក្នុងការដាក់វិធានការពាណិជ្ជកម្មទូលំទូលាយ ដោយប្រើច្បាប់ស្តីពីអំណាចគ្រាអាសន្ន។

ក្រុមអ្នកជំនាញជឿថា ការប្ដឹងផ្ដល់នេះមានឱកាសជោគជ័យសមរម្យបន្តិចដែរ ប៉ុន្តែក៏ព្រមានថា ដំណើរការផ្លូវច្បាប់ដ៏យឺតយ៉ាវ មានន័យថាអាចបន្តបង្កើនភាពមិនច្បាស់លាស់សម្រាប់អាជីវកម្មដែលកំពុងប្រឈមនឹងពន្ធថ្មី។

ចាប់តាំងពីខែកុម្ភៈមក រដ្ឋបាលលោក Trump ដាក់ចេញក្រឹត្យបន្តបន្ទាប់ដោយប្រកាសភាពអាសន្នជាតិ និងដាក់ពន្ធលើការនាំចូលទាំងអស់។ រដ្ឋបាលបានលើកយកច្បាប់អំណាចសេដ្ឋកិច្ចគ្រាអាសន្នអន្តរជាតិនៃឆ្នាំ១៩៧៧ ឬហៅកាត់ថាច្បាប់ IEEPA ដើម្បីបង្ហាញភាពត្រឹមត្រូវនៃពន្ធរបស់ខ្លួន ដែលជាលើកទីមួយដែលច្បាប់នេះត្រូវប្រើប្រាស់សម្រាប់វិធានការពាណិជ្ជកម្មដ៏ធំ។

បណ្តឹងមកពីគ្រប់មជ្ឃដ្ឋាននោះអះអាងថា លោក Trump ពុំមានសិទ្ធិអំណាចគ្រប់គ្រាន់ក្នុងការដំឡើងពន្ធក្រោមច្បាប់ IEEPA ទេ ដោយហេតុផលថា ច្បាប់ដែលផ្តល់អំណាចដល់ប្រធានាធិបតីក្នុងការដាក់ទណ្ឌកម្មឆ្លើយតបទៅនឹងភាពអាសន្នអន្តរជាតិនេះ មិនអនុញ្ញាតឱ្យមានការដំឡើងពន្ធឡើយ ហើយថា ក្រឹត្យពន្ធគឺជាការបំពានលើការបែងចែកអំណាចនៅសហរដ្ឋអាមេរិក។

ក្នុងចំណោមការប្ដឹងផ្ដល់ទាំងនោះ កាលីហ្វ័រនីញ៉ា បានក្លាយជារដ្ឋដំបូងគេដែលប្តឹងរដ្ឋបាលលោក Trump ជុំវិញពន្ធ។ បណ្តឹងទាំងអស់នោះសំខាន់ជាពិសេសចំពោះឧស្សាហកម្មបច្ចេកវិទ្យា ដោយសារតែពន្ធខ្ពស់បំផុតត្រូវបានដាក់លើការនាំចូលរបស់ចិន --ដែលកំពុងស្ថិតក្នុងការបន្ទាបដល់ ៣០% ត្រឹម ៩០ថ្ងៃ-- ខណៈទីក្រុងប៉េកាំង ជាអ្នកផ្គត់ផ្គង់ផលិតផលអេឡិចត្រូនិកដ៏សំខាន់នៅសហរដ្ឋអាមេរិក៕