នាយករដ្ឋមន្ត្រីអ៊ីស្រាអែលលោក Benjamin Netanyahu បានប្តេជ្ញាជាថ្មីទៀត ថានឹងនាំយកចំណាប់ខ្មាំងទាំងអស់មកវិញ ទាំងអ្នកនៅមានជីវិត ទាំងអ្នកស្លាប់ ខណៈក្រុមអ្នកជួយសង្គ្រោះនៅតំបន់ហ្កាហ្សាបាននិយាយថា ការវាយប្រហាររបស់អ៊ីស្រាអែលបានសម្លាប់មនុស្សយ៉ាងហោចណាស់ ៥២នាក់។  

ការអត្ថាធិប្បាយរបស់លោក Netanyahu នៅពេលនេះ បានកើតឡើងបន្ទាប់ពីប្រភពប៉ាឡេស្ទីនបាននិយាយថា ក្រុមអ្នកសម្របសម្រួលបានស្នើបទឈប់បាញ់រយៈពេល ៧០ថ្ងៃ និងការដោះលែងចំណាប់ខ្មាំងអ៊ីស្រាអែល ១០ នាក់ រួមជាមួយអ្នកទោសប៉ាឡេស្ទីនមួយចំនួន ទោះបីជាបេសកជនអាមេរិក លោក Steve Witkoff ក្រោយមកបាននិយាយថា ក្រុមហាម៉ាស ពុំបានយល់ព្រមលើកិច្ចព្រមព្រៀងដែលបានស្នើឡើងក៏ដោយ។

នាយករដ្ឋមន្ត្រីអ៊ីស្រាអែលរូបនេះ បាននិយាយពីកាតព្វកិច្ចរំដោះអ្នកជាប់ឃុំថា ប្រសិនបើពួកលោកមិនសម្រេចបាននៅថ្ងៃនេះទេ ពួកលោកនឹងសម្រេចបាននៅថ្ងៃស្អែក ហើយបើមិនធ្វើបាននៅថ្ងៃស្អែកទេ ពួកលោកមិនបោះបង់ឡើយ។

លោកបានបន្ថែមថា អ៊ីស្រាអែល មានបំណងនាំពួកគេទាំងអស់គ្នា   ទាំងអ្នកនៅរស់ និងអ្នកស្លាប់មកវិញឲ្យទាល់តែបាន ប៉ុន្តែពុំបាននិយាយអំពីកិច្ចព្រមព្រៀងដែលបានស្នើឡើងទេ។

ការលើកឡើងបែបនេះរបស់លោកបានកើតមានឡើងបន្ទាប់ពីប្រភពមួយរបស់ក្រុមហាម៉ាសបាននិយាយកាលពីថ្ងៃចន្ទដើមសប្ដាហ៍នេះថាក្រុមនេះបានទទួលយកសំណើបទឈប់បាញ់ដែលនឹងមើលឃើញចំណាប់ខ្មាំងចំនួន ១០ នាក់ត្រូវបានដោះលែង។ 

លោក Netanyahu បាននិយាយថាអ៊ីស្រាអែល នឹងមានឆន្ទៈយល់ព្រមឲ្យមានបទឈប់បាញ់បណ្ដោះអាសន្នមួយ ជាថ្មូរនឹងការដោះលែងចំណាប់ខ្មាំង ដោយលោកបានប្ដេជ្ញាថា សង្រ្គាមអាចបញ្ចប់ទៅបានដរាបណា ឬសគល់ ក្រុមហាម៉ាស ត្រូវបានកម្ចាត់៕