យោងតាមរដ្ឋអាជ្ញាប្រចាំខេត្តរបស់អឺរ៉ុង បានឱ្យដឹងថា ក្រុមអាជ្ញាធរបានចុះបង្ក្រាប និងចាប់ខ្លួនអ្នកបើកបររថយន្តដឹកទំនិញជាច្រើននាក់ ដែលធ្វើកូដកម្មក្នុងទីក្រុង Shiraz ភាគខាងត្បូង ខណៈការតវ៉ារបស់អ្នកបើកបរនៅទូទាំងប្រទេស បានឈានដល់ថ្ងៃទីប្រាំ កាលពីថ្ងៃចន្ទ (២៦ ឧសភា) ម្សិលមិញនេះ។

លោក Kamran Mirhaji រដ្ឋអាជ្ញានៃខេត្ត Fars បាននិយាយកាលពីថ្ងៃចន្ទថា "បាតុករដែលរារាំងចរាចរនៃរថយន្តដឹកទំនិញ ត្រូវបានកំណត់អត្តសញ្ញាណ និងត្រូវចាប់ខ្លួន ក្រោមការត្រួតពិនិត្យរបស់ភ្នាក់ងារសន្តិសុខ និងសមត្ថកិច្ច"។

ចាប់តាំងពីការចាប់ផ្តើមនៅថ្ងៃទី១៨ ខែឧសភា នៅក្នុងទីក្រុងកំពង់ផែ Bandar Abbas ភាគខាងត្បូងមក ការតវ៉ាដែលមានការសម្របសម្រួលនោះ បានរីករាលដាលយ៉ាងទូលំទូលាយនៅទូទាំងប្រទេសអ៊ីរ៉ង់ ដោយបាតុករប្ដេជ្ញាថានឹងឈប់សម្រាកមិនធ្វើការពេញមួយសប្តាហ៍ ឬយូរជាងនេះ ប្រសិនបើការទាមទាររបស់ពួកគេនៅតែមិនទទួលបានការឆ្លើយតប។

អ្នកបើកបរកំពុងទាមទារលក្ខខណ្ឌការងារប្រសើរជាងមុន អត្រាតម្លៃដឹកជញ្ជូនខ្ពស់ និងការបន្ធូរបន្ថយពីថ្លៃធានារ៉ាប់រងកប់ពពក និងការរឹតត្បិតប្រេងឥន្ធនៈ។ ការចាប់ខ្លួននេះកើតឡើងនៅពេលវីដេអូទទួលបានដោយសារព័ត៌មាន Iran International កាលពីថ្ងៃចន្ទ បង្ហាញពីកូដកម្មឈានចូលដល់ថ្ងៃទីប្រាំ ហើយនិងបន្តនៅទូទាំងតំបន់ជាច្រើននៃប្រទេស រួមទាំងខេត្ត Fars ជាទីដែលការឃុំខ្លួនជាច្រើនបានកើតឡើង៕