ប្រទេសអេស្ប៉ាញ កំពុងត្រៀមលក្ខណៈទប់ទល់រលកកម្ដៅដ៏អាក្រក់នៅចុងខែឧសភា ខាងមុខនេះ ដោយសីតុណ្ហភាពនៅតំបន់ភាគខាងត្បូងនៃប្រទេស បានព្យាករថានឹងហក់ឡើងដល់ ៤០អង្សាសេ ខណៈតំបន់ដែលមានសម្ពាធខ្ពស់ និងម៉ាស់ខ្យល់ក្តៅស្ងួត នាំឱ្យសីតុណ្ហភាពកើនហួសពី ១០អង្សាសេ លើសបទដ្ឋានតាមរដូវកាល។

សីតុណ្ហភាពដ៏ខ្ពស់នេះ កើតឡើងជិត ៣ឆ្នាំបន្ទាប់ពីតំបន់មួយចំនួននៃប្រទេសអេស្ប៉ាញ បានជួបប្រទះនឹងខែឧសភាក្តៅបំផុត ចាប់តាំងពីកំណត់ត្រាបានចាប់ផ្តើម ហើយសីតុណ្ហភាពនៅអាកាសយានដ្ឋាន Seville បានឡើងដល់ ៤១អង្សាសេ យ៉ាងក្ដៅគគុក។

លោក Rubén del Campo អ្នកនាំពាក្យការិយាល័យឧតុនិយមអេស្ប៉ាញ Aemet បាននិយាយថា "សប្តាហ៍ចុងក្រោយនៃខែឧសភានេះ នឹងមើលឃើញសីតុណ្ហភាពខ្ពស់ខ្លាំងនៅទូទាំងផ្នែកនៃឧបទ្វីប ជាមួយនឹងកម្រិតកម្ដៅមិនធម្មតា ជាពិសេសចាប់ពីថ្ងៃពុធ ២៨ ឧសភា" ខាងមុខ។

កម្ដៅដ៏កំណាចនោះត្រូវបានព្យាករថានឹងបន្តរហូតដល់យ៉ាងហោចណាស់ថ្ងៃសៅរ៍ចុងសប្ដាហ៍នេះ នៅពេលដែលអស្ថិរភាពនៃបរិយាកាស អាចនាំមកនូវសំណុំពពក និងសីតុណ្ហភាពធ្លាក់ចុះ។ អេស្ប៉ាញ បានកត់ត្រាកម្ដៅខ្ពស់បំផុតមិនធ្លាប់មាននៅក្នុងខែសីហា ឆ្នាំ២០២១ នៅពេលសីតុណ្ហភាពនៅទីប្រជុំជន Andalucían នៃទីក្រុង Montoro ឡើងដល់ ៤៧,៤អង្សាសេ យ៉ាងគ្រោះថ្នាក់៕