ប្រធានាធិបតី Donald Trump បានប្រារព្ធទិវាប្រចាំឆ្នាំ ដើម្បីគោរពដល់អ្នកពលីក្នុងសង្រ្គាមរបស់សហរដ្ឋ កាលពីថ្ងៃចន្ទ (ទី២៦ ខែឧសភា) ដោយហៅគូប្រជែង និងចៅក្រម ដែលមិនគាំទ្ររូបលោកថា ជាជន «អាក្រក់ណាស់»។

លោក Trump បានបំពេញតួនាទីជាប្រពៃណី ក្នុងនាមប្រធានាធិបតី នៅទិវារំលឹកគុណ ដោយទៅកាន់ទីបញ្ចុះសពជាតិ Arlington National Cemetery ដែលជាកន្លែង សម្រាប់បញ្ចុះទាហានពលីប្រហែល ៤០០.០០០នាក់ និងកន្លែងផ្សេងទៀត។

ហើយបន្ទាប់ពីដាក់កម្រងផ្កានៅផ្នូររបស់ទាហានទាំងនោះរួចហើយ លោក Trump បានថ្លែងសុន្ទរកថាដែលភាគច្រើនដូចគ្នាទៅនឹងការរៀបរាប់ជាប្រពៃណីរបស់ប្រធានាធិបតី ក្នុងការពោលសរសើរវីរបុរសសង្រ្គាមរបស់សហរដ្ឋអាមេរិក។

តែមេដឹកនាំទៅពីបក្សសាធារណរដ្ឋវ័យ ៧៨ឆ្នាំរូបនេះ បានចាប់ផ្តើមថ្ងៃរបស់លោក ដោយការបង្ហោះសារខឹងសម្បាយ៉ាងវែងជាអក្សរធំទាំងអស់ នៅលើគណនីបណ្ដាញសង្គម Truth Social របស់លោក។ លោកបានសរសេរថា៖ «រីករាយថ្ងៃរំលឹកគុណអ្នកទាំងអស់គ្នា ក្នុងនោះរួមទាំងជនអាក្រក់ ដែលចំណាយពេល ៤ឆ្នាំចុងក្រោយ ដើម្បីព្យាយាមបំផ្លាញប្រទេសរបស់យើង»។

លោក Trump ក៏បានស្តីបន្ទោសមេដឹកនាំនយោបាយមុនៗ និងចោទប្រកាន់ចៅក្រម ដែលលោកបាននិយាយថា ស្អប់សហរដ្ឋអាមេរិក ដោយព្យាយាមរក្សាទុកមនុស្សដែលមានគ្រោះថ្នាក់ ដូចជាឃាតករ អ្នកជួញដូរគ្រឿងញៀន អ្នករំលោភសេពសន្ថវៈ សមាជិកក្រុមអន្ធពាល និងអតីតអ្នកទោសមកពីប្រទេសផ្សេងទៀត នៅក្នុងសហរដ្ឋអាមេរិក ដើម្បីឲ្យពួកគេអាចប្រព្រឹត្តឧក្រិដ្ឋកម្មបន្ថែមទៀត៕