ប្រភពក្រសួងការបរទេសទួរគី បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន និងរដ្ឋមន្ត្រីការបរទេសទួរគី បានពិភាក្សាគ្នានៅក្នុងកិច្ចប្រជុំមួយ ក្នុងទីក្រុងមូស្គូ អំពីកិច្ចខិតខំប្រឹងប្រែង ដើម្បីបញ្ចប់សង្រ្គាមនៅអ៊ុយក្រែន និងការវិវឌ្ឍ ចាប់តាំងពីការពិភាក្សាដោយផ្ទាល់រវាងភាគីជម្លោះ។

រដ្ឋមន្ត្រីការបរទេសទួរគីលោក Hakan Fidan កំពុងបំពេញទស្សនកិច្ចរយៈពេល ពីរថ្ងៃ នៅទីក្រុងមូស្គូ ជាកន្លែងដែលប្រភព បាននិយាយថា លោកបានជួបជាមួយលោក ពូទីន កាលពីថ្ងៃចន្ទ និងអ្នកចរចាជាន់ខ្ពស់របស់រុស្ស៊ីលោក Vladimir Medinsky ផងដែរ។ លោក Fidan ជួបសមភាគីរុស្ស៊ីលោក សឺហ្គេ ឡាវរ៉ូវ (Sergei Lavrov) នៅថ្ងៃអង្គារនេះ។

ខណៈដែលមិនទាន់បានកំណត់ពេលវេលា ឬទីតាំង ត្រូវបានព្រមព្រៀងសម្រាប់ការចរចានាពេលអនាគត រវាងរុស្ស៊ី និងអ៊ុយក្រែន សម្ព័ន្ធមិត្តណាតូទួរគី បាននិយាយម្តងហើយម្តងទៀតថា ខ្លួនអាចធ្វើជាម្ចាស់ផ្ទះជំនួបរបស់ពួកគេបាន។

គណៈប្រតិភូមកពីទីក្រុងមូស្គូ និងទីក្រុងគីវ បានជួបប្រជុំគ្នា នៅទីក្រុងអ៊ីស្តង់ប៊ុល កាលពីដើមខែនេះ ជាលើកដំបូង ចាប់តាំងពីខែមីនា ឆ្នាំ ២០២២ មួយខែបន្ទាប់ពីប្រទេសរុស្ស៊ី បានឈ្លានពានអ្នកជិតខាងរបស់ខ្លួន គឺអ៊ុយក្រែន។ គ្មានបទឈប់បាញ់ ត្រូវបានព្រមព្រៀងគ្នាទេ ប៉ុន្តែភាគីទាំងពីរ បានយល់ព្រមធ្វើការដោះដូរអ្នកទោសសង្គ្រាមចំនួន ១.000នាក់ ហើយផ្តល់លក្ខខណ្ឌរបស់ពួកគេសម្រាប់លទ្ធភាពបទឈប់បាញ់ ជាលាយលក្ខណ៍អក្សរ។

ប្រភពទួរគីបាននិយាយថា នៅក្នុងកិច្ចប្រជុំរបស់ពួកគេ លោកពូទីន និងហ្វីដានបានពិភាក្សាអំពី "គំនិតផ្តួចផ្តើមដែលបានអនុវត្តនាពេលថ្មីៗនេះ ដើម្បីបញ្ចប់សង្រ្គាមរវាងអ៊ុយក្រែន និងរុស្ស៊ី (និង) ការវិឌ្ឍ បន្ទាប់ពីការចរចាដែលបានធ្វើឡើង នៅទីក្រុងអ៊ីស្តង់ប៊ុល»។