ក្នុងជំរំសំពត់តង់បណ្តោះអាសន្ននៅទីក្រុងហ្កាហ្សា អ្នកស្រី Amani Maarouf វ័យ ២៧ឆ្នាំ បានត្រឹមតែចម្អិននំប៉ាស្តាបរិមាណដ៏តិចតួចបំផុតសម្រាប់កូនៗរបស់គាត់ប៉ុណ្ណោះ ។

ស្រ្តីជាម្តាយកូន ៣នាក់រូបនេះ និងប្តី Issa Maarouf អាយុ ៣១ឆ្នាំ និយាយប្រាប់ទីភ្នាក់ងារព័ត៌មានរ៉យទ័រពីទុក្ខលំបាករាល់ថ្ងៃរបស់ពួកគេ ក្នុងការស្វែងចំណីអាហារមកទទួលទាន និងរំឭកដល់ពេលដែលកូនៗរបស់ពួកគេភ្ញាក់ដឹងខ្លួននៅពេលយប់នាំយំឃ្លានរកអ្វីទទួលទាន ។

យោងតាមការអះអាងរបស់ក្រុមតាមដានភាពស្រេកឃ្លានសកល បានឲ្យដឹងថា ជំនួយមនុស្សធម៌អន្តរជាតិ ចាប់ផ្តើមហូរចូលបន្តិចបន្តួចទៅក្នុងតំបន់ហ្កាហ្សាកាលពីសប្តាហ៍មុន ក្រោយអ៊ីស្រាអែលស្របតាមសំពាធអន្តរជាតិ ហើយនិងដកចេញការបិទច្រកដែលពួកគេបានដាក់កាលពីដើមខែមីនា ដែលធ្វើឲ្យជនប៉ាឡេស្ទីនកន្លះលាននាក់ ប្រឈមនឹងភាពអត់ឃ្លាន ។

អ៊ីស្រាអែល និងសហរដ្ឋអាមេរិក ចង់ចែកចាយស្បៀងទៅកាន់តំបន់ដែលគ្រប់គ្រងដោយទាហានអ៊ីស្រាអែលប៉ុណ្ណោះ គឺជាផែនការមួយត្រូវបានទីភ្នាក់ងារជំនួយ និងអង្គការសហប្រជាជាតិ(UN)ថ្កោលទោសយ៉ាងខ្លាំង ដោយពួកគេនិយាយថា វានឹងនាំឲ្យមានការជម្លៀសខ្លួនមនុស្សបន្ថែមទៀត ហើយជំនួយគួរតែហូរចូលតាមបណ្តាញមានស្រាប់ ។

ប្រធានជំនួយ UNលោក Tom Fletcher និយាយកាលពីសប្តាហ៍មុនថា បរិមាណជំនួយដែលអ៊ីស្រាអែលស្នើសុំ ដើម្បីអនុញ្ញាតឲ្យចូលតំបន់ហ្កាហ្សា ស្មើនឹងមួយដំណក់ទឹកសមុទ្រប៉ុណ្ណោះ បើធៀបនឹងអ្វីដែលត្រូវការ ។

ក្រុមជំនួយនិយាយថា ការចែកចាយជំនួយត្រូវបានរារាំងដោយករណីចោរលួច ប៉ុន្តែពួកគេបានដាក់ការស្តីបន្ទោសលើអ៊ីស្រាអែល សម្រាប់ការបង្កើតស្ថានភាពបែបនេះ ពេលដែលមនុស្សរាប់ម៉ឺននាក់ អស់សង្ឃឹមក្នុងជីវិតដោយសារការបិទច្រក ។

អ៊ីស្រាអែល បានចោទប្រកាន់ក្រុមហាម៉ាសថា បានលួចជំនួយ គឺជាការចោទប្រកាន់មួយត្រូវបានពួកគេច្រានចោល ហើយបញ្ហាគ្រប់គ្រងរថយន្តដឹងជំនួយ បានក្លាយជាជម្លោះដ៏ក្តៅគគុកផងដែរ ៕