ក្រុមហ៊ុន Taiwan Semiconductor Manufacturing Co (TSMC) ដែលជាក្រុមហ៊ុនផលិតបន្ទះឈីបកិច្ចសន្យាធំជាងគេបំផុតរបស់ពិភពលោក នឹងបើកមជ្ឈមណ្ឌលរចនាបន្ទះឈីប នៅទីក្រុង Munich ប្រទេសអាល្លឺម៉ង់។ នេះបើតាមនាយកប្រតិបត្តិរបស់ក្រុមហ៊ុននេះ ដែលបានប្រាប់ឲ្យដឹង នៅថ្ងៃអង្គារ (ទី២៧ ខែឧសភា) នេះ។

ប្រធានសាខារបស់ក្រុមហ៊ុន TSMC នៅអឺរ៉ុប លោក Paul de Bot បានឲ្យដឹងនៅក្នុងព្រឹត្តិការណ៍សន្និសីទបច្ចេកវិទ្យាឆ្នាំ២០២៥ របស់ក្រុមហ៊ុនថា មជ្ឈមណ្ឌលរចនា នៅទីក្រុង Munich (Munich Design Centre) នឹងបើកដំណើរការ អំឡុងត្រីមាសទី៣ នៃឆ្នាំ២០២៥។

លោក de Bot បាននិយាយថា៖ «មជ្ឈមណ្ឌលនោះមានគោលបំណងគាំទ្រដល់អតិថិជនអឺរ៉ុប ក្នុងការរចនាបន្ទះឈីបដែលមានដង់ស៊ីតេខ្ពស់ ដំណើរការកម្រិតខ្ពស់ និងប្រើប្រាស់ថាមពលតិច ដោយផ្តោតម្ដងទៀតលើកម្មវិធី នៅក្នុងរថយន្ត ឧបករណ៍ឧស្សាហកម្ម AI (បញ្ញាសិប្បនិម្មិត) និង IoT (ឧបករណ៍វៃឆ្លាតភ្ជាប់ជាមួយប្រព័ន្ធអ៊ីនធឺណិត)»។

ជាមួយគ្នានេះ រួមគ្នាជាមួយក្រុមហ៊ុន Infineon, NXP និង Robert Bosch ក្រុមហ៊ុន TSMC កំពុងសាងសង់រោងចក្រផលិតមីក្រូឈីបថ្មីមួយ នៅទីក្រុង Dresden ប្រទេសអាល្លឺម៉ង់ ដែលហៅថា ក្រុមហ៊ុន European Semiconductor Manufacturing Company (ESMC)៕