រវាងការថ្កោលទោសចំពោះពន្ធគយពាណិជ្ជកម្មសហរដ្ឋអាមេរិករបស់លោក ដូណាល់ ត្រាំ (Donald Trump) និងការរិះគន់លើការអះអាងរបស់ទីក្រុងប៉េកាំង នៅសមុទ្រចិនខាងត្បូង ប្រធានាធិបតីបារាំងលោក អេម៉ានុយអែល ម៉ាក្រុង ( Emmanuel Macron) បានព្រមាននិស្សិតវៀតណាមនៅថ្ងៃអង្គារនេះថា«តាមកម្លាំងនៃមហាអំណាច អ្វីគ្រប់យ៉ាងអាចផ្លាស់ប្តូរបាន»។

លោក ម៉ាក្រុង កំពុងស្ថិតនៅក្នុងប្រទេសវៀតណាម ជាផ្នែកនៃដំណើរទស្សនកិច្ចនៅអាស៊ីអាគ្នេយ៍រយៈពេល ៦ថ្ងៃ ដែលរួមមានប្រទេសឥណ្ឌូនេស៊ី និងសិង្ហបុរី ខណៈដែលលោកព្យាយាមបង្ហាញការផ្តល់ជូនរបស់លោកនូវ «វិធីទី៣» រវាងសហរដ្ឋអាមេរិក និងចិន ទៅកាន់តំបន់ដែលជាប់នៅក្នុងការប្រឈមមុខដាក់គ្នារវាងប្រទេសទាំងពីរ។

លោកបានប្រាប់ក្រុមនិស្សិតប្រហែល ១៥០នាក់ នៅសាកលវិទ្យាល័យវិទ្យាសាស្ត្រ និងបច្ចេកវិទ្យា ក្នុងទីក្រុងហាណូយថា៖«ជម្លោះរវាងចិន និងសហរដ្ឋអាមេរិក គឺជាការពិតភូមិសាស្ត្រនយោបាយដែលរងឥទ្ធិពលពីហានិភ័យនៃជម្លោះកាន់តែធំ នៅក្នុងតំបន់ដ៏សំខាន់នេះ»។

លោកបាននិយាយថា ប្រទេសចិន នឹងចងចាំបានល្អថា៖«សេរីភាពនៃការធ្វើនាវាចរណ៍ សេរីភាពនាវាចរណ៍មានសារៈសំខាន់សម្រាប់សមុទ្រចិនខាងត្បូង” លោកបានបន្ថែមថា អ្វីដែលកំពុងកើតឡើងនៅទីនោះ «ធ្វើឲ្យគ្រប់គ្នាព្រួយបារម្ភ»។