មេដឹកនាំអាស៊ីអាគ្នេយ៍ នឹងរៀបចំកិច្ចប្រជុំកំពូលជាលើកដំបូងមិនធ្លាប់មានជាមួយប្រទេសចិន និងក្រុមប្រឹក្សាសហប្រតិបត្តិការឈូងសមុទ្រ (GCC) ដែលមានសមាជិកចំនួន ៦ប្រទេស ខណៈដែលប្លុកនេះព្យាយាមការពារសេដ្ឋកិច្ចដែលពឹងផ្អែកលើពាណិជ្ជកម្មរបស់ខ្លួន ពីផលប៉ះពាល់ដោយសារពន្ធធ្ងន់ធ្ងររបស់សហរដ្ឋអាមេរិក។

កិច្ចប្រជុំនេះ នៅក្នុងរដ្ឋធានីម៉ាឡេស៊ី គឺកូឡាឡាំពួរ នឹងប្រព្រឹត្តទៅនៅថ្ងៃអង្គារ (ទី២៧ ខែឧសភា) នេះ ដែលជាថ្ងៃទី២ នៃកិច្ចប្រជុំកំពូលប្រចាំឆ្នាំរបស់សមាគមប្រជាជាតិអាស៊ីអាគ្នេយ៍ (អាស៊ាន) ដែលមានសមាជិក ១០ប្រទេស។ បច្ចុប្បន្ន ម៉ាឡេស៊ីគឺជាប្រធានអាស៊ាន ដែលក៏រួមមានប្រ៊ុយណេ កម្ពុជា ឡាវ សហភាពមីយ៉ាន់ម៉ា ហ្វីលីពីន សិង្ហបុរី ថៃ និងវៀតណាមផងដែរ។ កិច្ចប្រជុំនេះនឹងកើតឡើងបន្ទាប់ពីមានកិច្ចពិភាក្សាដាច់ដោយឡែកពីគ្នា រវាងបណ្ដាមេដឹកនាំនៃសមាជិករបស់អាស៊ាន និង GCC ជាប្លុកដែលមានប្រទេសបារ៉ែន គុយវ៉ែត អូម៉ង់ កាតា អារ៉ាប៊ីសាអ៊ូឌីត និងអារ៉ាប់រួម។

នាយករដ្ឋមន្ត្រីម៉ាឡេស៊ី លោក Anwar Ibrahim ដែលបើកកិច្ចប្រជុំកំពូលអាស៊ាន-GCC បាននិយាយថា ទំនាក់ទំនងកាន់តែរឹងមាំ រវាងប្លុកទាំង២ នឹងក្លាយជាគន្លឹះដ៏សំខាន់ក្នុងការពង្រឹងកិច្ចសហប្រតិបត្តិការ ការកសាងភាពធន់ និងធានាបាននូវវិបុលភាពប្រកបដោយចីរភាព។

លោក Anwar បានលើកឡើងថា៖ «ខ្ញុំជឿថា ភាពជាដៃគូអាស៊ាន-GCC មិនដែលមានសារៈសំខាន់ជាពិសេសដូចថ្ងៃនេះឡើយ ខណៈដែលយើងត្រូវប្រឹងប្រែងរកផ្លូវដោះស្រាយទិដ្ឋភាពពិភពលោកដែលកាន់តែស្មុគស្មាញឡើងៗ ពោលគឺដែលត្រូវបានសម្គាល់ដោយភាពមិនច្បាស់លាស់ខាងសេដ្ឋកិច្ច និងបញ្ហាប្រឈមភូមិសាស្ត្រនយោបាយ»។

នៅក្នុងការកត់សម្គាល់ជាលាយលក្ខណ៍អក្សរ មុនកិច្ចប្រជុំនេះ លោកនាយករដ្ឋមន្ត្រីម៉ាឡេស៊ីរូបនេះ បាននិយាយថា៖ «ការផ្លាស់ប្តូរនៅក្នុងសណ្ដាប់ធ្នាប់ភូមិសាស្ត្រនយោបាយ កំពុងកើតមានឡើង ហើយថា «ប្រព័ន្ធពាណិជ្ជកម្មពិភពលោកកំពុងស្ថិតក្រោមភាពតានតឹងបន្ថែមទៀត ដោយសារវិធានការដំឡើងពន្ធជាឯកតោភាគីរបស់សហរដ្ឋអាមេរិក នាពេលថ្មីៗនេះ»៕