ទីក្រុងតូក្យូ នៅថ្ងៃអង្គារ (ទី២៧ ខែឧសភា) នេះ បានប្រាប់ឲ្យដឹងថា ប្រទេសជប៉ុន បានចោទប្រកាន់ប្រទេសចិនថា បានធ្វើការស្រាវជ្រាវវិទ្យាសាស្ត្រដែនសមុទ្រដោយមិនមានការជូនដំណឹង ក្នុងតំបន់សេដ្ឋកិច្ចផ្តាច់មុខរបស់ខ្លួន នៅជុំវិញចុងភាគខាងត្បូងនៃកោះ ក្នុងមហាសមុទ្រប៉ាស៊ីហ្វិក។

សកម្មភាពដែលត្រូវបានចោទប្រកាន់នេះ បានកើតឡើងកាលពីថ្ងៃចន្ទ (ទី២៦ ខែឧសភា) នៅជិតតំបន់ដាច់ស្រយាលនៃកោះ Okinotori ក្នុងសមុទ្រហ្វីលីពីន ដែលស្ទើរតែនៅចន្លោះកណ្តាល រវាងកោះតៃវ៉ាន់ និងកោះហ្គាំ។ តែប្រទេសចិនបានលើកឡើងថា ខ្លួនមិនបានចាត់ទុកតំបន់នេះថា ជាកោះនោះទេ។

អ្នកនាំពាក្យរដ្ឋាភិបាល លោក Yoshimasa Hayashi បានប្រាប់អ្នកយកព័ត៌មានថា កាលពីថ្ងៃចន្ទ ឆ្មាំល្បាតឆ្នេររបស់ប្រទេសជប៉ុន បានប្រទះឃើញនាវាស្ទាបស្ទង់ដែនសមុទ្ររបស់ចិន «បន្លាយនូវអ្វីដែលមើលទៅដូចជាខ្សែលោហៈចូលទៅក្នុងទឹក នៅក្នុងតំបន់សេដ្ឋកិច្ចផ្តាច់មុខ (EEZ) របស់ប្រទេសជប៉ុន ចម្ងាយ ២៧០គីឡូម៉ែត្រ នៅភាគខាងកើតនៃកោះ Okinotori»។

លោក Hayashi បាននិយាយថា៖ «ដោយសារតែការស្រាវជ្រាវវិទ្យាសាស្ត្រដែនសមុទ្រដោយនាវាមិនទាន់ទទួលបានការព្រមព្រៀងពីប្រទេសជប៉ុន ឆ្មាំសមុទ្របានតម្រូវឲ្យបញ្ឈប់សកម្មភាពនោះ ហើយយើងបានដាក់ការតវ៉ាជាមួយភាគីចិន តាមរយៈបណ្តាញការទូត»។ លោក Hayashi បានបញ្ជាក់ថា នាវារបស់ប្រទេសចិន បានចាកចេញពី EEZ នៅម៉ោងប្រហែល ១០:៤៥យប់ថ្ងៃចន្ទ។

នៅក្រោមច្បាប់អន្តរជាតិ រដ្ឋឆ្នេរមួយមានសិទ្ធិគ្រប់គ្រងធនធានធម្មជាតិ និងសកម្មភាពសេដ្ឋកិច្ចផ្សេងទៀត នៅក្នុង EEZ របស់ខ្លួន ដែលមានចម្ងាយ ២០០ម៉ាយល៍ណត់ ឬ ៣៧០គីឡូម៉ែត្រពីឆ្នេររបស់ខ្លួន។ ការយល់ព្រមជាមុន គឺត្រូវការជាចាំបាច់ សម្រាប់នាវាបរទេស ដើម្បីអនុវត្តការស្រាវជ្រាវវិទ្យាសាស្ត្រសម្រាប់គោលបំណងមិនសេដ្ឋកិច្ច នៅក្នុង EEZ របស់ប្រទេសមួយផ្សេងទៀត។

តែទោះបីជាយ៉ាងណាក្ដី ប្រទេសចិនបានលើកឡើងថា ការអះអាងរបស់ជប៉ុន គឺមិនត្រឹមត្រូវឡើយ ដោយសារ Okinotori ដែលមានចម្ងាយប្រហែល ១.៧០០គីឡូម៉ែត្រ នៅភាគខាងត្បូងនៃទីក្រុងតូក្យូ គ្រាន់តែជាតំបន់មានថ្ម និងមិនមែនជាកោះនោះទេ៕