​បាល់ទាត់៖ ​ព្រឹត្តិការណ៍​បាល់ទាត់​ជើងឯក​ទ្វីបអាហ្វ្រិក Africa Cup of Nations ដែលមាន​ពាក្យ​ចចាមអារ៉ាម​ថា​លុបចោល​នោះ នៅពេលនេះ​គណៈកម្មាធិការ​រៀបចំ​កា​រ​ប្រកួត ជាពិសេស​ម្ចាស់​ផ្ទះកា​ម៉េ​រូ​ន​បានបញ្ជាក់​ហើយ​ថា ការប្រកួត​នឹង​ដំណើរការ​ទៅបាន​តាម​ការគ្រោងទុក​។ ​​មួយរយៈ​ចុងក្រោយ​នេះ​មាន​សារព័ត៌មាន​កីឡា​ធំៗ​បាន​ចុះផ្សាយ​ថា ការប្រកួត​ព្រឹ​តិ្ត​ការណ៍​ធំជាងគេ​ប្រចាំ​ទ្វីបអាហ្វ្រិក​មួយ​នេះ​អាច​នឹងត្រូវ​លុបចោល រឺក៏​លើក​ពេល​បន្តទៀត​ ដោយសារ​ការផ្ទុះ​រីក​រាលដាល​ឆ្លង​ខ្លាំង​នៃ​មេរោគ​ប​ម្លែ​ង​ខ្លួន Covid-19 អូ​មី​ក្រុង​។​

​​ជាមួយគ្នា​នោះដែរ​សហព័ន្ធ​បាល់ទាត់​ទ្វីបអាហ្វ្រិក​ក៏បាន​ស្នើឱ្យ FIFA ជួយ​ផងដែរ​ដើម្បី​ធ្វើ​អន្តរា​គម​ដល់​បណ្តា​ក្លិប​នៅ​អឺរ៉ុប​ ឱ្យ​បញ្ជូន​កីឡាករ​អាហ្វ្រិក​មកជួយ​ក្រុម​ជំរើសជាតិ បន្ទាប់ពី​បណ្តា​ក្លិប​អាជីព​ទាំងនោះ​មិន​ចង់​ដោះលែង​កីឡាករ​របស់ខ្លួន​ មក​ដោយសារ​ព្រួយបារម្ភពី​កាលវិភាគ​ប្រកួត​ដ៏​មមាញឹក​របស់​ពួកគេ និង​រឿង​មេរោគ​ឆ្លង Covid-19 តែម្តង​។ ​​ឧទាហរណ៍​ដូចជា Liverpool មាន Mohamed Salah (​អេ​ហ្ស៊ីប​), Sadio Mane (​សេ​ណេ​ហ្កា​ល់​), Naby Keita (​នី​ហ្សេ​រី​យ៉ា) ខណៈ Chelsea មាន​កីឡាករ​អ្នកចាំទី Edouard Mendy (​សេ​ណេ​ហ្កា​ល់​), Hakim Ziyech (​ម៉ា​រ៉ុ​ក​) ឯ Arsenal មានដូចជា​ខ្សែប្រយុទ្ធ​ហ្កា​បុ​ង Pierre-Emerick Aubameyang, កីឡាករ​អេ​ហ្ស៊ីប Mohamed Elneny និង​កីឡាករ​កូ​ឌី​វ័រ Nicolas Pepe ជាដើម​។

​​ក្រុមបាល់ទាត់​ចំនួន ២៤ នឹងចូលរួម​ការប្រកួត​ពានរង្វាន់​បាល់ទាត់​ធំជាងគេ​ប្រចាំ​ទ្វីបអាហ្វ្រិក​នេះ ដែល​នឹងចាប់ផ្តើម​ពីថ្ងៃ​ទី៩ ខែមករាខាង​មុខនេះ​ដល់​ថ្ងៃទី៦ ខែកុម្ភៈ ​ឆ្នាំ២០២២​។ ​​អ្នកគាំទ្រ​ដែល​បាន​ចាក់​វ៉ាក់សាំង​គ្រប់​ចំនួន និង​កាត​បញ្ជាក់​ត្រឹមត្រូវ​នឹងត្រូវ​បានអនុញ្ញាត​ឱ្យចូល​ទស្សនា​ក្នុងកីឡដ្ឋាន​បាន​៕

​អត្ថបទ​៖​នាង សុភា​វុ​ធ