មន្ត្រីក្នុងតំបន់ នៅថ្ងៃអង្គារ (ទី២៧ ខែឧសភា) នេះ បានប្រាប់ឲ្យដឹងថា យ៉ាងហោចណាស់មនុស្សចំនួន ៤២នាក់ ត្រូវបានបាញ់សម្លាប់ដោយក្រុមជនដែលត្រូវបានសង្ស័យថា ជាអ្នកចិញ្ចឹមសត្វ អំឡុងការវាយប្រហារជាបន្តបន្ទាប់កាលពីចុងសប្តាហ៍ទូទាំងតំបន់ Gwer West នៅភាគកណ្តាលរដ្ឋ Benue របស់ប្រទេសនីហ្សេរីយ៉ា។

លោក Victor Omnin ប្រមុខរដ្ឋបាលក្នុងតំបន់ Gwer West បាននិយាយថា សពចំនួន ៣២នាក់ ត្រូវបានប្រទះឃើញ បន្ទាប់ពីមានការវាយប្រហារកាលពីថ្ងៃអាទិត្យចុងសប្ដាហ៍កន្លងមក លើភូមិ Ahume និង Aondona ខណៈដែល ១០នាក់ផ្សេងទៀត ត្រូវបានសម្លាប់នៅក្នុងការវាយប្រហារដាច់ដោយឡែកមួយទៅលើភូមិ Tyolaha និង Tse-Ubiam កាលពីថ្ងៃសៅរ៍។

លោក Omnin បានប្រាប់អ្នកសារព័ត៌មានថា៖ «វាជាទិដ្ឋភាពដ៏គួរឲ្យអាណោចអាធ័មណាស់។ ដូចដែលយើងនិយាយ យើងនៅតែរកប្រទះឃើញសពជាច្រើន»។

គួរបញ្ជាក់ថា រដ្ឋ Benue ស្ថិតនៅក្នុងតំបន់ខ្សែក្រវាត់កណ្ដាល (Middle Belt) របស់ប្រទេសនីហ្សេរីយ៉ា ជាតំបន់មួយដែលអ្នកកាន់សាសនាឥស្លាមដោយភាគច្រើន នៅភាគខាងជើង ប្រឈមជាមួយនឹងអ្នកសាសនាគ្រិស្តដោយភាគច្រើន នៅភាគខាងត្បូង។ តំបន់នេះប្រឈមនឹងបញ្ហាដណ្ដើមប្រើប្រាស់ដីធ្លី ពោលគឺជាការមានជម្លោះ រវាងអ្នកចិញ្ចឹមសត្វដែលស្វែងរកដីសម្រាប់ចិញ្ចឹមគោក្របី និងកសិករដែលត្រូវការដីបង្កបង្កើនផល សម្រាប់ការដាំដុះ។ ភាពតានតឹងទាំងនេះ ជាញឹកញាប់កាន់តែអាក្រក់ឡើងៗ ដោយសារជម្លោះជាតិសាសន៍ និងសាសនា៕