​បាល់ទាត់៖ ​អ្នកចាត់ការ​ក្រុមបាល់ទាត់ Brentford លោក Thomas Frank បាន​និយាយ​ក្នុង​សន្និសីទ​សារ​ព័ត៌​មាននៅ​ថ្ងៃ​ព្រហស្បតិ៍​ម្សិល​មិញ​ថា លោក​ចង់​ឱ្យ​គ្រប់ការ​ប្រកួត​ទាំងអស់​ក្នុង​សប្ដាហ៍​នេះ​របស់ English Premier League លើក​ពេល ដើម្បីឱ្យ​ក្លិប​មាន​ពេល​រៀបចំ​ក្នុង​កាលៈទេសៈ​នៃ​មេរោគ​ឆ្លង​រាតត្បាត​នៅពេលនេះ​។

​​លោក Frank Thomas មុន Brentford ជួប​ជាមួយ Southampton ចុង​សប្តាហ៍​នេះ​បាន​បញ្ជាក់ថា ​ក្រុម​របស់លោក​ធ្វើតេស្ត​រកឃើញ​វិជ្ជមាន Covid-19 ៤នាក់​បន្ថែមទៀត​ដែល​ធ្វើឱ្យ​សរុប​នៅពេលនេះ​ឡើងដល់ ១៣នាក់​ទាំងកីឡាករ ​និង​បុគ្គលិក​ក្លិប​។ ​​រំលឹកថា ៣ប្រកួត​រួចមកហើយ​ត្រូវបាន​លើក​ពេល​ដោយសារ​បញ្ហា​ឆ្លង​មេរោគ Covid-19 នេះ​រួមមាន Brighton ជួប Spurs , Brentford ជួប Manchester United និង Burnley ជួប Watford​។ ​​ថ្ងៃ​ព្រហស្បតិ៍​ម្សិលមិញ​នេះដែរ Chelsea ក៏បាន​រកឃើញ​កីឡាករ​ ៣នាក់​ក្នុង​ក្រុម​ធំ​របស់ខ្លួន​ឆ្លង Covid-19 ផងដែរ​។

​​សូមបញ្ជាក់ថា ​ប្រទេស​ក្នុង​តំបន់​អឺរ៉ុប​កំពុង​ព្រ​ឈម​នឹង​ខ្លាំងនឹង​មេរោគ Covid-19 បម្លែង​ខ្លួន​ Omicron ​ដែល​កំពុង​រីក​រាលដាល ​ស្របពេល​ចក្រភព​អង់គ្លេស​ទើប​ចាប់ផ្តើម​យុទ្ធនា​ការ ចាក់​វ៉ាក់សាំង​ដូ​ស​ជំរុញ​ដល់​ពលរដ្ឋ​របស់ខ្លួន​ប៉ុណ្ណោះ​។ ​​Premier League ក៏បាន​ស្នើ​សុំឱ្យកីឡាករ​អាជីព​ទាំងអស់​ទៅ​ទទួល​វ៉ាក់សាំង​ឱ្យបាន​គ្រប់ៗ​គ្នា​ផងដែរ​៕

​អត្ថបទ​៖​នាង សុភា​វុ​ធ