នគរបាលនៅប្រទេសកោះ សាំងវ៉ាំងសង់ និងហ្គ្រេណាឌីន (St. Vincent and the Grenadines) នៅតំបន់សមុទ្រការ៉ាអ៊ីបភាគខាងកើត កាលពីថ្ងៃអង្គារ (២៧ ឧសភា) បាននិយាយថា ពួកគេរកឃើញទូកមួយគ្រឿងនៅឆ្នេរនៃកោះ Canouan ផ្ទុកសាកសពមនុស្សដែលជឿថាចំនួន ១១នាក់ ហើយអ្នកស្លាប់ទាំងនោះអាចមកពីប្រទេសម៉ាលី ខណៈការស៊ើបអង្កេតត្រូវធ្វើឡើងដើម្បីកំណត់អត្តសញ្ញាណសព។

ប្រធានរងនគរបាល លោក Junior Simmons បាននិយាយនៅក្នុងសារវីដេអូមួយថា "លិខិតឆ្លងដែនជាច្រើនរបស់ជនរងគ្រោះ ត្រូវរកឃើញនៅកន្លែងកើតហេតុ ដែលហាក់ដូចជាមកពីសាធារណរដ្ឋម៉ាលី ខណៈសាកសពមានសភាពរលួយខ្លាំង ហើយខ្លះមិននៅក្នុងទម្រង់ដើមទេ"។

នៅប្រទេសកោះ សាំងឃីត និងណេវីស (St. Kitts and Nevi) ក្បែរនោះ អាជ្ញាធរក្នុងខែមករា បាននិយាយថា ពួកគេរកឃើញនាវាមួយគ្រឿង មានសាកសព ១៩នាក់ ដែលប៉ាន់ស្មានថាបាននៅក្នុងសមុទ្រអស់ជាយូរ ដោយសារតែដំណាក់កាលនៃការរលួយកម្រិតខ្ពស់ខ្លាំងពេក។ អាជ្ញាធរក៏រកឃើញអត្តសញ្ញាណបណ្ណ បង្ហាញថាអ្នកដំណើរមួយចំនួនក៏មកពីម៉ាលី ដែលជាប្រទេសអាហ្វ្រិកខាងលិចគ្មានព្រំដែនសមុទ្រ ចម្ងាយប្រហែល ៦.២០០គីឡូម៉ែត្រ ភាគខាងកើតឆ្លងកាត់មហាសមុទ្រអាត្លង់ទិក។

មហាសមុទ្រអាត្លង់ទិក នៅឆ្នេរសមុទ្រអាហ្វ្រិកខាងលិចនេះ គឺជាផ្លូវសមុទ្រដ៏គ្រោះថ្នាក់បំផុតរបស់ពិភពលោក ជាមួយនឹងចរន្តទឹកហូរទៅទិសខាងលិច និងខ្យល់បក់ខ្លាំង ដែលមានសមត្ថភាពរុញច្រាននាវាឱ្យទៅឆ្ងាយហួសពីផ្លូវធ្វើដំណើរ៕