ប្រធានាធិបតីបារាំងលោក Emmanuel Macron នឹងជួបសមភាគីឥណ្ឌូនេស៊ី លោក Prabowo Subianto នៅទីក្រុងហ្សាការតា នាថ្ងៃពុធ (ទី២៨ ខែឧសភា) ហើយការពង្រឹងទំនាក់ទំនងការពារជាតិជាមួយអតិថិជនទិញអាវុធដ៏ធំបំផុតរបស់ទីក្រុងប៉ារីស នៅអាស៊ីអាគ្នេយ៍ នឹងកា្លយជាប្រធានបទសំខាន់ នៅក្នុងកិច្ចពិភាក្សារបស់ពួកលោក។

គួរបញ្ជាក់ថា ប្រទេសឥណ្ឌូនេស៊ី គឺជាជើងទី២ នៃដំណើរទស្សនកិច្ចក្នុងតំបន់របស់លោក Macron បន្ទាប់ពីវៀតណាម ជាទីដែលប្រទេសទាំង២ បានចុះហត្ថលេខាលើកិច្ចព្រមព្រៀងតម្លៃជាង ១០ពាន់លានដុល្លារ។ រូបលោកគ្រោងនឹងចេញដំណើរទៅកាន់ប្រទេសសិង្ហបុរី នៅថ្ងៃព្រហស្បតិ៍។

រដ្ឋមន្ត្រីការពារជាតិឥណ្ឌូនេស៊ី លោក Sjafrie Sjamsoeddin ដែលបានស្វាគមន៍លោក Macron នៅពេលលោកទៅដល់ កាលពីយប់ថ្ងៃអង្គារ បាននិយាយថា ប្រទេសទាំង២ នឹងចុះហត្ថលេខាលើលិខិតនៃចេតនា និងការអភិវឌ្ឍកិច្ចសហប្រតិបត្តិការ នៅក្នុង «ផ្នែកហាដវែរ (Hardware) យោធាយុទ្ធសាស្ត្រ» ដោយលើកឡើងពីយន្តហោះចម្បាំង និងនាវាមុជទឹក។

ក្រសួងការបរទេសបានឲ្យដឹងនៅមុននេះថា ភាគីទាំង២ នឹងពិភាក្សាអំពី «ភាពជាដៃគូយុទ្ធសាស្ត្រដែលមានស្រាប់» ដោយមិនផ្តល់ព័ត៌មានលម្អិតជាក់លាក់ អំពីផ្នែកនៃការពិភាក្សានោះឡើយ។

គួររំលឹកថា ក្នុងឆ្នាំ២០២២ ប្រទេសទាំង២ បានចុះហត្ថលេខាលើកិច្ចព្រមព្រៀងការពារជាតិតម្លៃ ៨,១ពាន់លានដុល្លារអាមេរិក ដែលរួមមានការបញ្ជាទិញយន្តហោះចម្បាំង Rafale ចំនួន ៤២គ្រឿងផលិតដោយក្រុម Dassault Aviation របស់បារាំង ក៏ដូចជាកិច្ចព្រមព្រៀងជាបន្តបន្ទាប់ ក្នុងនោះរួមទាំងការអភិវឌ្ឍនាវាមុជទឹក និងគ្រាប់រំសេវផងដែរ៕