សហរដ្ឋអាមេរិក កាលពីថ្ងៃអង្គារ (ទី២៧ ខែឧសភា) បានពណ៌នាអង្គការសហប្រជាជាតិ (UN) និងក្រុមអង្គការមិនមែនរដ្ឋាភិបាលមួយចំនួនថា ជាប្រភេទក្រុមមានស្ដង់ដារ២ ពាក់ព័ន្ធនឹងការរិះគន់កិច្ចប្រឹងប្រែងផ្តល់ជំនួយដែលគាំទ្រដោយសហរដ្ឋអាមេរិក និងអ៊ីស្រាអែល នៅតំបន់ហ្កាហ្សា ខណៈបាននិយាយថា អាហារបានចូលដែនដីប៉ាឡេស្ទីនដោយជោគជ័យ។

ដោយហៅការរិះគន់នេះថា ជាទង្វើ «ស្តង់ដារ ២ អាក្រក់បំផុត» អ្នកនាំពាក្យក្រសួងការបរទេសអាមេរិក លោកស្រី Tammy Bruce បានប្រាប់អ្នកសារព័ត៌មានថា៖ «វាជារឿងគួរឲ្យសោកស្ដាយ ពីព្រោះនេះគឺបញ្ហាផ្តល់ជំនួយដល់តំបន់ហ្កាហ្សា ហើយស្រាប់តែមានការការតវ៉ាអំពីរបៀប ឬលក្ខណៈនៃអ្នកធ្វើកិច្ចការនោះ»។

លោកស្រីបានបន្ថែមថា៖ «រឿងពិត គឺជំនួយ និងស្បៀងអាហារ កំពុងធ្វើដំណើរទៅតំបន់ហ្កាហ្សា ក្នុងទំហំដ៏ធំ។ នៅពេលអ្នកមើលអាហារមានចំនួនដល់ទៅ ៨.០០០ប្រអប់ តើវានឹងដូចនឹងការទៅផ្សារទំនើប ឬការបើកបរឆ្លងកាត់ទិញទំនិញយ៉ាងដូចម្ដេច? ទេ វាមិនមែនបែបនោះឡើយ។ នេះគឺជាបរិយាកាសដ៏ស្មុគស្មាញ តែអ្វីដែលសំខាន់ ការងារកំពុងតែដំណើរការទៅ»។

គួរបញ្ជាក់ថា ប្រជាជនប៉ាឡេស្ទីនរាប់ពាន់នាក់បានប្រញាប់ប្រញាល់ទៅកាន់មជ្ឈមណ្ឌលចែកចាយជំនួយថ្មីមួយ កាលពីថ្ងៃអង្គារ ដោយមានការបាញ់ព្រមានពីកងទ័ពអ៊ីស្រាអែល។ ប៉ុន្មានថ្ងៃមុននេះ អ៊ីស្រាអែលបានអនុញ្ញាតឲ្យស្បៀងអាហារ និងការផ្គត់ផ្គង់ផ្សេងទៀតចូលទៅក្នុងដែនដីដែលត្រូវបានបំផ្លិចបំផ្លាញដោយសង្រ្គាមមួយនេះ ក្រោយរារាំងជាង ២ខែ ហើយខណៈដែលការព្រមានកើនឡើង អំពីទុរ្ភិក្ស។

ក្រុមអង្គការមិនមែនរដ្ឋាភិបាល លើកឡើងថា មូលនិធិមនុស្សធម៌ហ្កាហ្សាថ្មីដែលគាំទ្រដោយសហរដ្ឋអាមេរិក ខ្វះអ្នកជំនាញ ដើម្បីដោះស្រាយស្ថានភាពមនុស្សធម៌ដ៏ធ្ងន់ធ្ងរបែបនេះ ដែលទាមទារច្រើនជាងការត្រឹមតែផ្តល់អាហារប្រអប់ ហើយការចែកចាយជំនួយចាំបាច់ត្រូវដាច់ដោយឡែកពីគ្នាយ៉ាងតឹងរ៉ឹងពីអ្នកបះបោរ៕