ដោយដកស្រង់សម្តីមន្ត្រី ៣រូបដែលនិយាយក្នុងលក្ខខណ្ឌមិនបញ្ចេញឈ្មោះ និងដែលដឹងអំពីកិច្ចពិភាក្សានេះ សារព័ត៌មាន Financial Times កាលពីថ្ងៃអង្គារ (ទី២៧ ខែឧសភា) បានរាយការណ៍ថា សហរដ្ឋអាមេរិក បានប្រឆាំងនឹងកិច្ចប្រឹងប្រែងរួមគ្នារបស់ក្រុមប្រទេសមានឧស្សាហកម្មលូតលាស់ទាំង៧ (G7) ដើម្បីកំណត់តម្លៃឲ្យនៅ ៦០ដុល្លារ ក្នុងមួយបារ៉ែល លើការនាំចេញប្រេងរបស់រុស្ស៊ី អំឡុងកិច្ចប្រជុំកាលពីសប្តាហ៍មុនរបស់រដ្ឋមន្ត្រីហិរញ្ញវត្ថុ។

តម្លៃកំណត់ដែលត្រូវបានណែនាំដោយ G7 និងសហភាពអឺរ៉ុប (EU) ក្នុងខែធ្នូ ឆ្នាំ២០២២ បានហាមឃាត់ដល់ក្រុមហ៊ុនលោកខាងលិចមិនឲ្យដឹកជញ្ជូន មិនឲ្យធានា ឬមិនឲ្យផ្តល់ការគាំទ្រសេវាផ្សេងទៀត ចំពោះប្រេងរបស់រុស្ស៊ីដែលលក់លើសពី ៦០ដុល្លារ ក្នុងមួយបារ៉ែល។ យន្តការនេះត្រូវបានរៀបចំឡើង ដើម្បីកម្រិតសមត្ថភាពរបស់វិមានក្រឹមឡាំង ក្នុងការផ្តល់ហិរញ្ញប្បទានដល់សង្គ្រាមប្រឆាំងនឹងអ៊ុយក្រែន។

បើយោងតាមការចុះផ្សាយរបស់សារព័ត៌មាននេះ បានឲ្យដឹងថា កាណាដា ដែលដឹកនាំ G7 បានស្នើរួមបញ្ចូលទាំងភាសានៅក្នុងសេចក្តីថ្លែងការណ៍ចុងក្រោយរបស់កិច្ចប្រជុំ ដែលនឹងអំពាវនាវឲ្យមានការរឹតបន្តឹងលើតម្លៃមានស្រាប់។

ចំណាត់ការនេះ ទទួលបានការគាំទ្រពី EU និងសមាជិក G7 ដែលមានបារាំង អាល្លឺម៉ង់ អ៊ីតាលី និងចក្រភពអង់គ្លេស។ តែទោះជាយ៉ាងណាក្ដី សំណើនេះត្រូវបានទម្លាក់ចោលបន្ទាប់ពីរដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent បើតាមសេចក្តីរាយការណ៍ បានបដិសេធមិនគាំទ្រ៕