អាជ្ញាធររុស្ស៊ីបានឲ្យដឹងថា ពួកគេបានតាមបំផ្លាញយានដ្រូនអ៊ុយក្រែនជិត ១៥០គ្រឿង ពេញមួយយប់រហូតដល់ថ្ងៃទី២៨ ខែឧសភា ជាវាយប្រហារដ៏ធំមួយដែលបានបង្ខំឲ្យអាកាសយានដ្ឋានទីក្រុងមូស្គូយ៉ាងហោចណាស់ចំនួន៣ ត្រូវផ្អាកជើងហោះហើរ។

តាមរយៈកម្មវិធីផ្ញើសារ Telegram ក្រសួងការពារជាតិ បានបង្ហោះថា យានដ្រូនរបស់អ៊ុយក្រែនចំនួន ១១២គ្រឿង ត្រូវបាន «បំផ្លាញ និងស្ទាក់ចាប់» នៅក្នុងតំបន់ចំនួន ៦ផ្សេងគ្នា ក្នុងរយៈពេល ៣ម៉ោងរហូតដល់ពាក់កណ្តាលអធ្រាត្រ។ ហើយអភិបាលក្រុងមូស្គូ លោក Sergei Sobyanin បាននិយាយថា យានដ្រូនចំនួន ៣៣គ្រឿងផ្សេងទៀត ដែលសំដៅឆ្ពោះទៅកាន់រដ្ឋធានីរុស្ស៊ី ត្រូវបានបាញ់ទម្លាក់។

យោធារុស្ស៊ីប្រកាសថា ការវាយប្រហារដោយយានដ្រូនរបស់អ៊ុយក្រែន កើតឡើងស្ទើររាល់ថ្ងៃ ប៉ុន្តែកម្រមានសភាពខ្លាំង និងកៀកៗគ្នា ក្នុងរយៈពេលខ្លីបែបនេះណាស់។ ទីក្រុងមូស្គូ ដែលមានចម្ងាយរាប់រយគីឡូម៉ែត្រពីព្រំដែន មិនមែនជាគោលដៅនៃការវាយប្រហារដ៏ធំបែបនេះទេ។ ប៉ុន្តែរដ្ឋធានីត្រូវបង្វែរផ្លូវហោះហើរកាន់តែច្រើនឡើងៗ ក្នុងប៉ុន្មានសប្តាហ៍ថ្មីៗនេះ។

ការវាយប្រហារនេះកើតឡើងបន្ទាប់ពីអ៊ុយក្រែន បានប្រាប់ឲ្យដឹងថា ខ្លួនបានប្រឈមនឹងការវាយប្រហារដោយយានដ្រូនរបស់រុស្ស៊ីរយៈពេល ៣ថ្ងៃយ៉ាងខ្លាំងក្លាបំផុត គិតចាប់តាំងពីទីក្រុងមូស្គូបានបើកការវាយលុកយោធារបស់ខ្លួន ក្នុងឆ្នាំ២០២២៕