លោក Volodymyr Zelenskyy បានអំពាវនាវឲ្យមានកិច្ចប្រជុំកំពូល ៣នាក់ជាមួយលោក Donald Trump និងលោក Vladimir Putin ខណៈដែលប្រធានាធិបតីអ៊ុយក្រែនរូបនេះព្យាយាមជំរុញឲ្យទីក្រុងមូស្គូបញ្ឈប់ការលុកលុយរយៈពេល ៣ឆ្នាំរបស់ខ្លួន។

ប្រធានាធិបតីរុស្ស៊ី លោក Putin បានច្រានចោលការអំពាវនាវឲ្យជួបជាមួយលោក Zelenskyy នៅប្រទេសទួរគី កាលពីដើមខែនេះ ហើយវិមានក្រឹមឡាំង បានប្រាប់ឲ្យដឹងថា ជំនួបរវាងមេដឹកនាំទាំង២ នឹងកើតឡើងបាន បន្ទាប់ពីឈានដល់ «កិច្ចព្រមព្រៀង» មួយចំនួន។ ប្រធានាធិបតីអាមេរិក បានសម្តែងការខកចិត្ត ចំពោះលោក Putin និងលោក Zelenskyy ដែលមិនទាន់ឈានដល់កិច្ចព្រមព្រៀងបញ្ចប់សង្គ្រាមនៅឡើយ។

ក្រសួងការពារជាតិនៅទីក្រុងមូស្គូ បានឲ្យដឹងថា ភាគីទាំង២ បានវាយប្រហារតាមអាកាសទ្រង់ទ្រាយធំដាក់គ្នាទៅវិញទៅមក ក្នុងរយៈពេលប៉ុន្មានសប្តាហ៍ថ្មីៗនេះ ដោយអ៊ុយក្រែនបានបាញ់យានដ្រូនជិត ៣០០គ្រឿងចូលដែនដីរុស្ស៊ី ត្រឹមមួយយប់។

នៅក្នុងការអត្ថាធិប្បាយទៅកាន់អ្នកសារព័ត៌មាន កាលពីថ្ងៃអង្គារ (ទី២៧ ខែឧសភា) លោក Zelenskyy បាននិយាយថា៖ «ប្រសិនបើលោក Putin មិនស្រណុកក្នុងការមានកិច្ចប្រជុំទ្វេភាគី ឬប្រសិនបើមនុស្សគ្រប់គ្នាចង់ឲ្យក្លាយជាកិច្ចប្រជុំត្រីភាគី ខ្ញុំមិនយល់ទាស់នោះឡើយ។ ខ្ញុំត្រៀមខ្លួនសម្រាប់កិច្ចប្រជុំ ក្នុងទម្រង់ណាមួយ»។

មេដឹកនាំអ៊ុយក្រែនបានបញ្ជាក់ថា លោកបានត្រៀមខ្លួនរួចជាស្រេច សម្រាប់កិច្ចប្រជុំ «Trump-Putin-Zelenskyy» ហើយក៏បានជំរុញឲ្យទីក្រុងវ៉ាស៊ីនតោនចាត់វិធានការលើទីក្រុងមូស្គូជាមួយនឹងកញ្ចប់ទណ្ឌកម្មដ៏ធ្ងន់ធ្ងរលើវិស័យធនាគារ និងថាមពលរបស់ប្រទេសនេះ៕