អ៊ីស្រាអែល នៅថ្ងៃពុធ (ទី២៨ ខែឧសភា) នេះ បានច្រានចោលសេចក្ដីរាយការណ៍ក្នុងទំព័រសារព័ត៌មាន New York Times (NYT) ដែលថា នាយករដ្ឋមន្ត្រីលោក Benjamin Netanyahu បាននិងកំពុងគំរាមបង្អាក់កិច្ចពិភាក្សា ស្តីពីកិច្ចព្រមព្រៀងនុយក្លេអ៊ែរ រវាងសហរដ្ឋអាមេរិក និងអ៊ីរ៉ង់ ដោយវាយប្រហារទីតាំងផលិតនុយក្លេអ៊ែរសំខាន់ៗរបស់អ៊ីរ៉ង់។

ជាការឆ្លើយតបនឹងអត្ថបទព័ត៌មាននេះ ការិយាល័យរបស់លោក Netanyahu បានចេញសេចក្តីថ្លែងការណ៍មួយដែលប្រាប់យ៉ាងសាមញ្ញថា៖ «ព័ត៌មានក្លែងក្លាយ»។

ដោយដកស្រង់សម្ដីពីក្រុមមន្ត្រីដែលផ្ដល់ព័ត៌មាន អំពីស្ថានភាពនេះ សារព័ត៌មាន NYT បានរាយការណ៍ថា មន្ត្រីអ៊ីស្រាអែលបារម្ភថា ប្រធានាធិបតីអាមេរិក លោក Donald Trump មានបំណងចង់ឈានដល់កិច្ចព្រមព្រៀងជាមួយអ៊ីរ៉ង់ ដែលលោកនឹងអនុញ្ញាតឲ្យទីក្រុងតេអេរ៉ង់បន្តរក្សាទីតាំងចម្រាញ់សារធាតុនុយក្លេអ៊ែរ ដែលជាបន្ទាត់ក្រហម សម្រាប់អ៊ីស្រាអែល។

សារព័ត៌មាននេះបានឲ្យដឹងថា អ៊ីស្រាអែលមានក្ដីបារម្ភជាពិសេស អំពីលទ្ធភាពនៃការឈានដល់កិច្ចព្រមព្រៀងបណ្តោះអាសន្នណាមួយ ដែលនឹងអនុញ្ញាតឲ្យអ៊ីរ៉ង់បន្តរក្សាទីតាំងនុយក្លេអ៊ែររបស់ខ្លួនរយៈពេលជាច្រើនខែ ឬសូម្បីតែច្រើនឆ្នាំ ខណៈពេលដែលកិច្ចព្រមព្រៀងចុងក្រោយត្រូវបានសម្រេច។

សេចក្ដីរាយការណ៍បានឲ្យដឹងទៀតថា មន្ត្រីអាមេរិកបារម្ភថា អ៊ីស្រាអែលអាចសម្រេចវាយប្រហារអ៊ីរ៉ង់ដោយផ្ដល់ការព្រមានតិចតួច ហើយបាននិយាយថា ចារកម្មអាមេរិកបានប៉ាន់ស្មានថា អ៊ីស្រាអែលអាចវាយប្រហារលើអ៊ីរ៉ង់ ក្នុងរយៈពេលត្រឹមតែ ៧ម៉ោងប៉ុណ្ណោះ។ ហើយសេចក្ដីរាយការណ៍បានបន្ថែមថា មន្ត្រីអ៊ីស្រាអែលបានព្រមានសមភាគីអាមេរិករបស់ខ្លួនថា លោក Netanyahu អាចបញ្ជាឲ្យមានការវាយប្រហារលើអ៊ីរ៉ង់ ទោះបីជាកិច្ចព្រមព្រៀងការទូតជោគជ័យត្រូវបានកើតឡើងក៏ដោយ៕