រដ្ឋមន្ត្រីការបរទេសអ៊ីតាលី នៅថ្ងៃពុធ (ទី២៨ ខែឧសភា) នេះ បាននិយាយថា ការបន្តការវាយលុករបស់អ៊ីស្រាអែល លើតំបន់ហ្កាហ្សាស្ទ្រីប បានក្លាយទៅជារឿងលែងអាចទទួលយកបានទៀតហើយ ហើយត្រូវតែបញ្ឈប់ជាបន្ទាន់ ដោយបានព្រមានប្រឆាំងនឹងការមានវិធានការណាមួយ ដើម្បីបង្ខំប្រជាជនប៉ាឡេស្ទីនឲ្យចេញពីតំបន់នោះ។

រដ្ឋមន្ត្រីការបរទេសលោក Antonio Tajani បាននិយាយប្រាប់ទៅកាន់សភា អំពីស្ថានភាព នៅតំបន់ហ្កាហ្សា ចំពេលមានការរិះគន់ពីលោកខាងលិចលើអ៊ីស្រាអែល ដែលបានលុកលុយដែនដីប៉ាឡេស្ទីន បន្ទាប់ពីមានការវាយប្រហារកាលពីថ្ងៃទី៧ ខែតុលា ឆ្នាំ២០២៣ ពីសំណាក់ក្រុមហាម៉ាសលើសហគមន៍ នៅភាគខាងត្បូងរបស់ខ្លួន។

លោក Tajani បានប្រាប់សភាថា៖ «ការឆ្លើយតបស្របច្បាប់របស់រដ្ឋាភិបាលអ៊ីស្រាអែល ចំពោះអំពើភេរវកម្មដ៏គួរឲ្យតក់ស្លុត និងគ្មានវិចារណញ្ញាណ កំពុងស្ថិតក្នុងទម្រង់អាក្រក់ទៅៗ និងមិនអាចទទួលយកបានទៀតឡើយ ដែលយើងសូមអំពាវនាវឲ្យអ៊ីស្រាអែលបញ្ឈប់ជាបន្ទាន់»។

ប្រទេសអ៊ីតាលី គឺជាអ្នកគាំទ្រដោយបើកចំហ ចំពោះអ៊ីស្រាអែល ប៉ុន្តែចាប់ផ្ដើមមិនសប្បាយចិត្តកាន់តែខ្លាំងឡើងៗ នៅក្នុងជួររដ្ឋាភិបាលចម្រុះនៃក្រុមស្តាំនិយម ជុំវិញយុទ្ធនាការយោធាដែលបន្តមានឥតឈប់ឈរ និងយូរអង្វែង។ ហើយបើតាមអាជ្ញាធរសុខាភិបាលហ្កាហ្សា បានឲ្យដឹងថា ជារួម ប្រជាជនប៉ាឡេស្ទីនជាង ៥៤.០០០នាក់ ត្រូវបានសម្លាប់នៅក្នុងសង្គ្រាមទាំងតាមផ្លូវអាកាស និងផ្លូវគោករបស់អ៊ីស្រាអែល។

លោក Tajani បានប្រាប់ការជជែកដេញដោលដ៏ក្តៅគគុកនៅសភាជាន់ទាបថា៖ «ការទម្លាក់គ្រាប់បែកត្រូវតែបញ្ចប់ ជំនួយមនុស្សធម៌ត្រូវតែចាប់ផ្តើមឡើងវិញឲ្យបានឆាប់តាមដែលអាចធ្វើទៅបាន ការគោរពច្បាប់មនុស្សធម៌អន្តរជាតិ ត្រូវតែស្ដារឡើងវិញ»៕