​

លក្ខខណ្ឌរបស់ប្រធានាធិបតីរុស្ស៊ី លោក Vladimir Putin ដើម្បីបញ្ចប់សង្រ្គាម នៅអ៊ុយក្រែន រួមបញ្ចូលការទាមទារ ដែលមេដឹកនាំលោកខាងលិចត្រូវសន្យាជាលាយលក្ខណ៍អក្សរបញ្ឈប់ការពង្រីកវត្តមានរបស់អង្គការណាតូ (NATO) ឆ្ពោះទៅខាងកើត និងដកទណ្ឌកម្មមួយចំនួនលើប្រទេសរុស្ស៊ី។ នេះបើយោងតាមប្រភពរុស្ស៊ីចំនួន ៣រូប ដែលដឹងពីកិច្ចពិភាក្សានេះ។

ប្រធានាធិបតីអាមេរិក លោក Donald Trump បានលើកឡើងម្តងហើយម្តងទៀតថា លោកចង់បញ្ចប់ជម្លោះអឺរ៉ុបដ៏អាក្រក់បំផុត គិតចាប់តាំងពីសង្គ្រាមលោកលើកទី២ ហើយបានបង្ហាញពីការខកចិត្តកាន់តែខ្លាំងឡើងជាមួយលោក Putin ក្នុងរយៈពេលប៉ុន្មានថ្ងៃថ្មីៗនេះ ដោយព្រមានកាលពីថ្ងៃអង្គារ (ទី២៧ ខែឧសភា) ថា មេដឹកនាំរុស្ស៊ី កំពុង «ប្រលែងលេងជាមួយភ្លើង» ដោយបដិសេធមិនចូលរួមក្នុងកិច្ចចរចាបទឈប់បាញ់ជាមួយទីក្រុងគីវ ខណៈដែលកងកម្លាំងរបស់លោកមានប្រៀប នៅសមរភូមិ។

បន្ទាប់ពីបានជជែកជាមួយលោក Trump អស់រយៈពេលជាង ២ម៉ោង កាលពីសប្តាហ៍មុន លោក Putin បាននិយាយថា លោកបានយល់ព្រមធ្វើការជាមួយអ៊ុយក្រែន លើអនុស្សរណៈដែលនឹងបង្កើតគ្រោងនៃកិច្ចព្រមព្រៀងសន្តិភាព ក្នុងនោះរួមទាំងពេលវេលានៃបទឈប់បាញ់ផងដែរ។ រុស្ស៊ីប្រាប់ថា បច្ចុប្បន្នខ្លួនកំពុងធ្វើកំណែសេចក្តីព្រាងនៃអនុស្សរណៈរបស់ខ្លួន ហើយមិនអាចប៉ាន់ប្រមាណបានថា នឹងត្រូវចំណាយពេលប៉ុន្មានយូរប៉ុនណានោះឡើយ។

ដោយនិយាយក្នុងលក្ខខណ្ឌមិនបញ្ចេញឈ្មោះ ប្រភពជាន់ខ្ពស់ម្នាក់ពីរុស្ស៊ីដែលដឹងអំពីការគិតកម្រិតខ្ពស់របស់វិមានក្រឹមឡាំង បានប្រាប់ថា៖ «លោក Putin បានត្រៀមខ្លួនជាស្រេចក្នុងការបង្កើតសន្តិភាព ប៉ុន្តែមិនមែនក្នុងតម្លៃណាក៏បាននោះឡើយ»។

ជាមួយគ្នានេះ ប្រភពរុស្ស៊ី ៣រូប បានបង្ហើបឲ្យដឹងថា លោក Putin ចង់បានការសន្យាជាលាយលក្ខណ៍អក្សររបស់មហាអំណាចលោកខាងលិច ក្នុងការមិនពង្រីកវត្តមានកងកម្លាំងរបស់សម្ព័ន្ធភាពណាតូដែលដឹកនាំដោយសហរដ្ឋអាមេរិកឆ្ពោះទៅភាគខាងកើត ដែលជាផ្លូវកាត់ផ្តាច់ការស្នើសុំសមាជិកភាពផ្លូវការ សម្រាប់អ៊ុយក្រែន ហ្សកហ្ស៊ី និងម៉ុលដាវី ក៏ដូចជាអតីតសាធារណរដ្ឋសហសូវៀតផ្សេងទៀត៕