សហភាពអឺរ៉ុប (EU) នៅថ្ងៃពុធ (ទី២៨ ខែឧសភា) នេះ បានសម្រេចដកទណ្ឌកម្មសេដ្ឋកិច្ច ដែលដាក់លើប្រទេសស៊ីរី ជាកិច្ចប្រឹងប្រែងមួយ ដើម្បីគាំទ្រដល់រដ្ឋាភិបាលអន្តរកាល និងការស្តារឡើងវិញរបស់ប្រទេសនេះ បន្ទាប់ពីរបបរបស់អតីតប្រធានាធិបតី លោក Bashar al-Assad ត្រូវបានផ្ដួលរលំ។

ចំណាត់ការនេះធ្វើឡើងបន្ទាប់ពីមានកិច្ចព្រមព្រៀងនយោបាយដែលសម្រេចបានកាលពីសប្តាហ៍មុន ដោយរដ្ឋមន្ត្រីការបរទេស EU ក្នុងការឲ្យលុបចោលទណ្ឌកម្មនេះ។

ក្រុមប្រឹក្សា បានឲ្យដឹងថា EU នឹងបន្តរក្សាការដាក់ទណ្ឌកម្ម ទាក់ទងនឹងរដ្ឋាភិបាលរបស់លោក Assad និងការរឹតបន្តឹង ដោយផ្អែកលើមូលដ្ឋានសន្តិសុខ ខណៈពេលដែលដាក់ទណ្ឌកម្មថ្មី ចំពោះបុគ្គល និងអង្គភាពពាក់ព័ន្ធទៅនឹងរលកនៃអំពើហិង្សា កាលពីខែមីនា។

ក្រុមប្រឹក្សាបានបន្ថែមថា «ក្រុមប្រឹក្សានឹងបន្តតាមដានការវិវត្ត ដោយផ្អែកលើស្ថានភាពជាក់ស្ដែង ហើយត្រៀមខ្លួនដាក់ចេញនូវវិធានការរឹតត្បិតបន្ថែមទៀត ប្រឆាំងនឹងអ្នករំលោភសិទ្ធិមនុស្ស និងអ្នកដែលបង្កអស្ថិរភាព នៅក្នុងប្រទេសស៊ីរី»៕