ស្ពានរងការបំផ្លិចបំផ្លាញ ការផ្តាច់ចរន្តអគ្គិសនី ស្ថានីយទឹកទទេស្អាត ហើយមន្ទីរពេទ្យត្រូវបានចោរចូលលួចគ្មានសេសសល់នៅទូទាំងប្រទេសស៊ូដង់ បង្ហាញពីផលប៉ះពាល់យ៉ាងធ្ងន់ធ្ងរលើហេដ្ឋារចនាសម្ព័ន្ធបណ្តាលមកពីសង្រ្គាមរយៈពេល ២ឆ្នាំ ។

ក្រុមអាជ្ញាធរ បានប៉ាន់ប្រមាណថា ប្រាក់រាប់រយពាន់លានដុល្លារ ត្រូវការដើម្បីកសាងប្រទេសមួយនេះឡើងវិញ ខណៈសង្រ្គាមរវាងភាគីជម្លោះនៅតែបន្ត ដោយប្រើប្រាស់យានដ្រូនវាយប្រហារលើស្ថានីយថាមពល ទំនប់ទឹក និងដឺប៉ូស្តុកប្រេងឥន្ធនៈ ។

កងទ័ពស៊ូដង់ និងកងកម្លាំងគាំទ្ររហ័ស(RSF) បាននឹងកំពុងធ្វើសង្រ្គាម ចាប់តាំងពីខែមេសា ឆ្នាំ ២០២៣រហូតមក ក្នុងនោះមនុស្សរាប់ម៉ឺននាក់ ត្រូវបានសម្លាប់ ឬរងរបួស ហើយមនុស្សប្រហែល ១៣លាននាក់ បានជម្លៀសខ្លួន ធ្វើឲ្យក្រុមផ្តល់ជំនួយចាត់ទុកថាជាវិបត្តិមនុស្សធម៌ដ៏អាក្រក់បំផុតនៅលើពិភពលោក ។

ប្រជាពលរដ្ឋរស់នៅក្នុងទីក្រុង Khartoum រងទុកលំបាកដោយសារការដាច់ចរន្តអគ្គិសនីរយៈពេលច្រើនសប្តាហ៍ គ្មានទឹកស្អាត ហើយមន្ទីរពេទ្យមានអ្នកជំងឺលើសចំណុះ ។ អាកាសយានដ្ឋានរបស់ពួកគេ រងការដុតបំផ្លាញ ដោយសំបកយន្តហោះនៅលើផ្លូវរត់ ។

អគារសំខាន់ៗភាគច្រើននៅទីប្រជុំជនទីក្រុង Khartoum រងការឆាបឆេះ សង្កាត់ធ្លាប់មានតម្លៃប្រែក្លាយជាទីក្រុងខ្មោច ជាមួយរថយន្តរងការបំផ្លិចបំផ្លាញ និងគ្រាប់មិនទាន់ផ្ទុះរាយប៉ាយពាសពេញផ្លូវ ។

លោក Tariq Ahmed វ័យ ៥៦ឆ្នាំ គឺជាពលរដ្ឋមួយរូបនិយាយថា ទីក្រុង Khartoum មិនអាចរស់នៅបានទៀតទេ ។ សង្រ្គាមបានបំផ្លាញជីវិតរបស់ពួកយើង និងប្រទេសរបស់ពួកយើង ពួកយើងយល់ឃើញថា គ្មានផ្ទះសម្បែងនោះទេ បើទោះបីជាកងទ័ពវិលត្រឡប់មកគ្រប់គ្រងវិញក៏ដោយ ៕