រដ្ឋមន្ត្រីការបរទេសរុស្ស៊ីលោក Sergey Lavrov បានស្នើឱ្យមានការចរចាជុំបន្ទាប់ជាមួយអ៊ុយក្រែននៅថ្ងៃចន្ទ ទី ២ ខែមិថុនា នៅទីក្រុងអ៊ីស្តង់ប៊ុល។ ទីក្រុង កៀវ (Kiev) ត្រូវបានគេរាយការណ៍ថាកំពុងពិភាក្សាអំពីការផ្តល់ជូននេះ។  

តំណាងភាគីទាំងពីរបានជួបប្រជុំគ្នាក្នុងទីក្រុងដូចគ្នានេះ កាលពីថ្ងៃទី១៦ ខែឧសភា ជាលើកដំបូងចាប់តាំងពីឆ្នាំ២០២២។

ក្នុងសេចក្តីថ្លែងការណ៍មួយកាលពីថ្ងៃពុធសប្ដាហ៍នេះ លោក Lavrov បាននិយាយថា ចាប់តាំងពីពេលនោះមក គណៈប្រតិភូរុស្ស៊ីបានរៀបចំអនុស្សរណៈមួយដែលបញ្ជាក់ពីលក្ខខណ្ឌរបស់ខ្លួនសម្រាប់ការសម្រេចបានដំណោះស្រាយយូរអង្វែងចំពោះជម្លោះនេះ។

រដ្ឋមន្ត្រីរុស្ស៊ីរូបនេះ បានរៀបរាប់ថា គណៈប្រតិភូរបស់លោកដឹកនាំដោយ អ្នកចរចាជាន់ខ្ពស់របស់រុស្ស៊ី លោក Vladimir Medinsky បានត្រៀមខ្លួនរួចជាស្រេចក្នុងការបង្ហាញអនុស្សរណៈនេះដល់គណៈប្រតិភូអ៊ុយក្រែន និងផ្តល់ការបំភ្លឺចាំបាច់ក្នុងអំឡុងពេលជុំទីពីរនៃការចរចាដោយផ្ទាល់ឡើងវិញនៅទីក្រុងអ៊ីស្តង់ប៊ុល ថ្ងៃចន្ទ ទី២ ខែមិថុនាខាងមុខនេះ។

លោក Lavrov បានសម្តែងក្តីសង្ឃឹមថា អស់អ្នកទាំងនោះ ដែលចាប់អារម្មណ៍ដោយស្មោះចំពោះជោគជ័យនៃដំណើរការសន្តិភាព ហើយមិនមែននិយាយត្រឹមតែបបូរមាត់ចំពោះរឿងនេះ នឹងគាំទ្រដល់ការចរចារដោយផ្ទាល់ជាថ្មីនៅទីក្រុងអ៊ីស្តង់ប៊ុលប្រទេសទួរគី។

រដ្ឋមន្ត្រីការបរទេសខាងលើនេះបានថ្លែងអំណរគុណចំពោះទួរគី សហរដ្ឋអាមេរិក និងអារ៉ាប៊ីសាអ៊ូឌីត ដែលបានជួយសម្រួលដល់កិច្ចសន្ទនារវាងទីក្រុងមូស្គូ និងក្រុងកៀវ។ លោកបានបន្ថែមថា ជាលទ្ធផលនៃកិច្ចពិភាក្សាកាលពីដើមខែនេះ ភាគីទាំងពីរបានដោះដូរអ្នកទោសដ៏ច្រើនបំផុតរហូតមកដល់បច្ចុប្បន្ន ដោយប្រទេសរុស្ស៊ី និងអ៊ុយក្រែនម្នាក់ៗបានដោះលែងកងទ័ពចំនួន១.០០០នាក់ ៕