ឯកអគ្គរដ្ឋទូតប៉ាឡេស្ទីនប្រចាំអង្គការសហប្រជាជាតិ លោក Riyad Mansour បានថ្លែងយ៉ាងរំជួលចិត្ត ទៅកាន់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ (២៨ ឧសភា) ដោយបានសម្រក់ទឹកភ្នែកខណៈលោកបានពណ៌នាអំពីទុក្ខលំបាក «មិនអាចទ្រាំបាន» របស់កុមារប៉ាឡេស្ទីន ក្នុងពេលមានសង្រ្គាមដែលនៅបន្តក្នុងតំបន់ហ្កាហ្សា។

លោក Mansour បានលើកឡើងពីករណីរបស់វេជ្ជបណ្ឌិត Alaa al-Najjar ជាវេជ្ជបណ្ឌិតជនជាតិប៉ាឡេស្ទីន ដែលបានបាត់បង់កូនចំនួន៩នាក់ក្នុងចំណោម១០នាក់របស់អ្នកស្រី បន្ទាប់ពីពួកគេត្រូវបានបញ្ជូនទៅដល់មន្ទីរពេទ្យដែលអ្នកស្រីធ្វើការ ដោយពួកគេបានស្លាប់រួចទៅហើយ។ លោក Mansour បាននិយាយបន្តថា «ភាពភ័យខ្លាច និងរបួសផ្លូវចិត្ត ពុំអាចយល់បាន និងមិនអាចទ្រាំទ្របាន។

លោក Mansour បញ្ជាក់ថា កុមារប៉ាឡេស្ទីនជាង ១.៣០០នាក់ត្រូវបានសម្លាប់ និងប្រហែល ៤.០០០នាក់បានរងរបួស ចាប់តាំងពីអ៊ីស្រាអែលបានបន្តប្រតិបត្តិការយោធានៅតំបន់ហ្កាហ្សា បន្ទាប់ពីការដួលរលំនៃបទឈប់បាញ់ កាលពីខែមីនា។ «ទាំងនេះ ជាកុមារ សុទ្ធតែជាកុមារ! កុមាររាប់សិបនាក់កំពុងស្លាប់ដោយភាពស្រេកឃ្លាន។