ប្រធានាធិបតីអាមេរិក លោក Donald Trump ទំនងជាបានកំណត់កាលបរិច្ឆេទរយៈពេលពីរសប្តាហ៍សម្រាប់លោក Vladimir Putin ដោយគំរាមឆ្លើយតបផ្សេងៗទៀត ប្រសិនបើសមភាគីរុស្ស៊ីនៅតែមិនស្ដាប់លោក។ 

នៅពេលវិមានក្រឹមឡាំងបង្កើនការវាយប្រហារលើអ៊ុយក្រែន លោក Trump ត្រូវបានសួរនៅក្នុងការិយាល័យប្រធានាធិបតី Oval កាលពីថ្ងៃពុធសប្ដាហ៍នេះថា តើរូបលោកគិតថាលោក Putin ចង់បញ្ចប់សង្រ្គាមដែរឬទេ។

លោក Trump បានប្រាប់អ្នកសារព័ត៌មានថា លោកមិនអាចប្រាប់ពីរឿងនោះបានទេ ប៉ុន្តែលោកនឹងប្រាប់ក្នុងរយៈពេលប្រហែលពីរសប្តាហ៍ទៀត ស្របពេលមានការរិះគន់ជាសាធារណៈជាច្រើនពីលោក Trump លើលោក Putin ។

ចាប់តាំងពីថ្ងៃអាទិត្យមក លោក Trump បានបង្ហោះសារជាច្រើននៅលើប្រព័ន្ធផ្សព្វផ្សាយសង្គមដោយនិយាយថាលោក Putin ពិតជាផ្ដេសផ្ដាសខ្លាំងណាស់ ហើយកំពុងប្រលែងលេងជាមួយភ្លើង បន្ទាប់ពីរុស្ស៊ីបានបង្កើនការវាយប្រហាររបស់ខ្លួនលើអ៊ុយក្រែន។សម្ដីរបស់លោកបានរុញឲ្យមានការវាយបកវិញពីរុស្ស៊ីដោយនិយាយថាលោក Trump មានអារម្មណ៍ឆេវឆាវហួសហេតុ។

ការទម្លាក់គ្រាប់បែកដោយរុស្សីត្រូវបានគេនិយាយថាជាការវាយប្រហារដ៏ធំ និងសាហាវបំផុតចាប់តាំងពីការចាប់ផ្តើមនៃសង្គ្រាមមកទល់នឹងពេលនេះនៅក្នុងឆ្នាំទីបួនរបស់ខ្លួន។

ការវាយប្រហាររបស់រុស្ស៊ីលើទីក្រុង Kyiv របស់អ៊ុយក្រែន បានសម្លាប់មនុស្សយ៉ាងហោចណាស់ ១៣នាក់ និងរាប់សិបនាក់ទៀតរងរបួស រួមទាំងកុមារផងដែរកាលពីចុងសប្តាហ៍មុន។

ហើយកាលពីថ្ងៃពុធសប្ដាហ៍នេះដែរ រុស្ស៊ីនៅតែបន្តការវាយប្រហារដោយគ្មានសញ្ញានៃការថយចុះឡើយ ។លោក Trump ថាលោកមានការខកចិត្តចំពោះលោកPutin ចំពោះការទម្លាក់គ្រាប់ជាបន្តបន្ទាប់ក្នុងការរិះគន់ជាថ្មីលើលោក Putin ខណៈសង្គ្រាមកាន់តែក្ដៅ៕