យោងតាមប្រភពបីរបស់រុស្ស៊ីដែលបានដឹងអំពីការចរចាឲ្យដឹងថា លក្ខខណ្ឌរបស់ប្រធានាធិបតី Vladimir Putin សម្រាប់ការបញ្ចប់សង្រ្គាមនៅអ៊ុយក្រែន រួមមានការទាមទារដែលមេដឹកនាំលោកខាងលិច សន្យាជាលាយលក្ខណ៍អក្សរបញ្ឈប់ការពង្រីកខ្លួនរបស់សម្ព័ន្ធយោធា NATO ឆ្ពោះទៅភាគខាងកើត និងដកទណ្ឌកម្មមួយចំនួនលើប្រទេសរុស្ស៊ី ។

ប្រធានាធិបតីអាមេរិកលោក Donald Trump បាននិយាយម្តងហើយម្តងទៀតថាលោកចង់បញ្ចប់ជម្លោះអឺរ៉ុបដ៏សាហាវបំផុតចាប់តាំងពីសង្គ្រាមលោកលើកទី ២ ហើយបានបង្ហាញពីការខកចិត្តកាន់តែខ្លាំងលើលោក Putin ក្នុងប៉ុន្មានថ្ងៃថ្មីៗនេះ ដោយព្រមានកាលពីថ្ងៃអង្គារថាមេដឹកនាំរុស្ស៊ីកំពុង លេងជាមួយភ្លើង ដោយការបដិសេធមិនចូលរួមក្នុងកិច្ចចរចាបទឈប់បាញ់ជាមួយក្រុង Kyiv ខណៈកងកម្លាំងរបស់រុស្ស៊ី ដណ្ដើមបានទឹកដីបន្ថែមទៀតនៅសមរភូមិ។

បន្ទាប់ពីបាននិយាយជាមួយលោក Trump អស់រយៈពេលជាងពីរម៉ោងកាលពីសប្តាហ៍មុន លោក Putin បាននិយាយថាលោកបានយល់ព្រមធ្វើការជាមួយអ៊ុយក្រែនលើអនុស្សរណៈដែលនឹងត្រួសត្រាយផ្លូវទៅកាន់កិច្ចព្រមព្រៀងសន្តិភាព រួមទាំងពេលវេលានៃបទឈប់បាញ់។ រុស្ស៊ីនិយាយថាបច្ចុប្បន្នខ្លួនកំពុងធ្វើសេចក្តីព្រាងកំណែនៃអនុស្សរណៈ ហើយមិនអាចប៉ាន់ស្មានថានឹងត្រូវចំណាយពេលប៉ុន្មានឡើយ។

ទីក្រុង Kyiv និងរដ្ឋាភិបាលអឺរ៉ុប បានចោទប្រកាន់ទីក្រុងមូស្គូពីបទធ្វើឲ្យបទឈប់បាញ់ជាប់គាំង ខណៈកងទ័ពរបស់ខ្លួនរុលទៅមុខនៅភាគខាងកើតអ៊ុយក្រែន។ប្រភពពីមន្ត្រីជាន់ខ្ពស់ម្នាក់របស់រុស្ស៊ី បាននិយាយថា លោក Putin បានត្រៀមខ្លួនរួចរាល់ក្នុងការបង្កើតសន្តិភាព ទោះក្នុងកាលៈទេសៈណាក៏ដោយ។ប្រភពរុស្ស៊ីទាំងបីបាននិយាយថា លោក Putin ចង់បានការសន្យា ជាលាយលក្ខណ៍អក្សរ ដោយមហាអំណាចលោកខាងលិចធំៗ មិនឱ្យពង្រីកសម្ព័ន្ធភាពណាតូដឹកនាំដោយសហរដ្ឋអាមេរិកទៅភាគខាងកើត ច្រានចោលសមាជិកភាពជាផ្លូវការចំពោះអ៊ុយក្រែន ហ្ស៊កហ្ស៊ី និងម៉ុលដូវ៉ា និងអតីតសាធារណរដ្ឋសូវៀតផ្សេងទៀត៕