តុលាការពាណិជ្ជកម្មសហរដ្ឋអាមេរិក កាលពីថ្ងៃពុធ បានរារាំងការដំឡើងពន្ធ «ថ្ងៃរំដោះ» របស់លោកប្រធានាធិបតី Donald Trump មិនឱ្យចូលជាធរមាន ដោយចេញសេចក្តីសម្រេចថា លោកប្រធានាធិបតី បានប្រព្រឹត្តហួសពីអំណាចរបស់លោក ដោយការដាក់ពន្ធលើការនាំចូលពីប្រទេសដែលលក់ទៅឱ្យសហរដ្ឋអាមេរិកច្រើនជាងពួកគេទិញ។

ការដំឡើងពន្ធឈប់ហើយចាប់ផ្តើមរបស់លោក Trump ដែលលោកបាននិយាយថា មានបំណងស្តារសមត្ថភាពផលិតកម្មរបស់សហរដ្ឋអាមេរិក បានធ្វើឱ្យទីផ្សារហិរញ្ញវត្ថុអាមេរិករង្គោះរង្គើ។

សេចក្តីសម្រេចកាលពីថ្ងៃពុធ អាចត្រូវបានប្តឹងឧទ្ធរណ៍ទៅតុលាការឧទ្ធរណ៍សហរដ្ឋអាមេរិកសម្រាប់តុលាការសហព័ន្ធក្នុងទីក្រុងវ៉ាស៊ីនតោនឌីស៊ី និងចុងក្រោយនៅតុលាការកំពូលរបស់សហរដ្ឋអាមេរិក។

តុលាការក៏បានរារាំងការកំណត់ពន្ធដាច់ដោយឡែក ដែលរដ្ឋបាល លោកTrump បានដាក់ទៅលើប្រទេសចិន ម៉ិកស៊ិក និងប្រទេសកាណាដា ចាប់តាំងពីការវិលត្រឡប់ទៅកាន់សេតវិមានវិញ ដើម្បីឆ្លើយតបទៅនឹងអ្វីដែលរដ្ឋបាលនេះនិយាយថាជាលំហូរដែលមិនអាចទទួលយកបាននៃគ្រឿងញៀន និងជនអន្តោប្រវេសន៍ខុសច្បាប់ ចូលទៅក្នុងសហរដ្ឋអាមេរិក។

អ្នកនាំពាក្យរងសេតវិមាន លោក Kush Desai បាននិយាយនៅក្នុងសេចក្តីថ្លែងការណ៍ថា «វាពុំមែនសម្រាប់ចៅក្រមដែលមិនជាប់ឆ្នោតដើម្បីសម្រេចពីរបៀបដោះស្រាយឲ្យបានសមស្របនូវភាពអាសន្នជាតិនោះទេ»។ លោកបាននិយាយបន្ថែមថា ប្រធានាធិបតី លោក Trump បានសន្យាថានឹងដាក់អាមេរិកជាអាទិភាព(America First) ហើយរដ្ឋបាលនេះ បានប្តេជ្ញាប្រើប្រាស់គ្រប់កម្រិតនៃអំណាចប្រតិបត្តិដើម្បីដោះស្រាយវិបត្តិ និងស្ដារឡើងវិញនូវភាពដ៏អស្ចារ្យរបស់អាមេរិក។