ស្នងការពាណិជ្ជកម្មអ៊ឺរ៉ុប លោក Maros Sefcovic បាននិយាយកាលពីថ្ងៃពុធ ទី២៨ ខែឧសភាថា សហភាពអឺរ៉ុប និងប្រទេសអារ៉ាប់រួម បានចាប់ផ្តើមការចរចាជាផ្លូវការសម្រាប់កិច្ចព្រមព្រៀងពាណិជ្ជកម្ម។

រដ្ឋមន្ត្រីពាណិជ្ជកម្មប្រទេសអារ៉ាប់រួម បាននិយាយថា ប្រទេសអារ៉ាប់រួម ពុំបានចាត់ទុកកិច្ចពិភាក្សាទ្វេភាគីសម្រាប់កិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុប ថាជាឧបសគ្គចំពោះកិច្ចព្រមព្រៀងស្រដៀងគ្នារវាងប្លុកទាំង២៧ប្រទេសនិងក្រុមប្រឹក្សាកិច្ចសហប្រតិបត្តិការឈូងសមុទ្រនោះទេ ។

លោករដ្ឋមន្ត្រីនិយាយថា ប្រទេសអារ៉ាប់រួម មានបំណងបញ្ចប់កិច្ចព្រមព្រៀងទ្វេភាគីជាមួយសហភាពអឺរ៉ុប «ក្នុងរយៈពេលខ្លីបំផុត ពី ៣ទៅ ៦ ខែ ចាប់ពីពេលនេះទៅ។ លោកបាននិយាយដូច្នេះ នៅទីក្រុងឌូបៃ ដោយនៅក្បែរស្នងការពាណិជ្ជកម្មសហភាពអឺរ៉ុប លោក Maros Sefcovic ខណៈសហភាពអឺរ៉ុប និងប្រទេសអារ៉ាប់រួម ចាប់ផ្តើមកិច្ចចរចាជាផ្លូវការ។

ប្រទេសអារ៉ាប់រួម ជារដ្ឋនៅមជ្ឈិមបូព៌ា មានឥទ្ធិពល និងសម្បូរដោយប្រេង បានតស៊ូមតិជាយូរមកហើយជុំវិញការចូលរួមរបស់សហភាពអឺរ៉ុបកាន់តែជ្រៅទៅក្នុងតំបន់ឈូងសមុទ្រ ដោយក្រុមប្រឹក្សាកិច្ចសហប្រតិបត្តិការឈូងសមុទ្រ(GCC) គឺជាទីផ្សារនាំចេញធំបំផុតទី៦របស់សហភាពអឺរ៉ុប។ ចាប់តាំងពីឆ្នាំ ២០២១ មក ប្រទេសអារ៉ាប់រួម បានផ្តួចផ្តើមបង្កើតកិច្ចព្រមព្រៀងពាណិជ្ជកម្ម ការវិនិយោគ និងកិច្ចសហប្រតិបត្តិការទ្វេភាគី ដែលហៅថាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ដើម្បីកាត់បន្ថយការពឹងផ្អែកលើឥន្ធនៈហ្វូស៊ីល និងជំរុញការរំពឹងទុកពីកំណើនរយៈពេលវែង។