មនុស្សជាង ១៧.០០០នាក់ នៅក្នុងខេត្ត Manitoba ភាគខាងលិចនៃប្រទេសកាណាដា កំពុងត្រូវបានជម្លៀសចេញ កាលពីថ្ងៃពុធ (ទី២៨ ខែឧសភា) ខណៈដែលតំបន់នេះ បានជួបប្រទះនូវការចាប់ផ្តើមដ៏អាក្រក់បំផុត ចំពោះរដូវកាលចំហេះព្រៃជាលើកដំបូង ក្នុងរយៈពេលជាច្រើនឆ្នាំ។

រដ្ឋមន្ត្រីប្រចាំខេត្ត Manitoba លោក Wab Kinew បានប្រាប់សន្និសីទសារព័ត៌មានថា៖ «រដ្ឋាភិបាល Manitoba បានប្រកាសភាពអាសន្នទូទាំងខេត្ត ដោយសារស្ថានភាពចំហេះព្រៃ»។ ហើយជាមួយគ្នានេះ លោកបានបញ្ជាក់ថា៖ «នេះគឺជាការជម្លៀសដ៏ធំបំផុតដែលប្រជាជនដោយភាគច្រើនរបស់ខេត្ត Manitoba នឹងចងចាំនៅក្នុងជីវិតរបស់ពួកគេ»។

ជាមួយគ្នានេះ លោក Kinew បាននិយាយថា លោកបានស្នើទៅនាយករដ្ឋមន្ត្រីកាណាដា លោក Mark Carney អនុញ្ញាតឲ្យយោធាជួយដល់ប្រតិបត្តិការជម្លៀស និងការពន្លត់អគ្គិភ័យ។ ហើយលោកបានបន្ថែមថា យន្តហោះយោធានឹងត្រូវដាក់ពង្រាយ «ក្នុងពេលឆាប់ៗ» ដើម្បីជួយជម្លៀសប្រជាជនចេញពីសហគមន៍ដាច់ស្រយាល នៅភាគខាងជើង ទៅកាន់ទីសុវត្ថិភាព រួមជាមួយនឹងការផ្ដល់ធនធានពន្លត់អគ្គិភ័យបន្ថែមទៀត។

ការជម្លៀស រួមមានទីក្រុង Flin Flon ជាទីដែលអ្នកស្រុកចំនួន ៥.០០នាក់ ត្រូវបានប្រាប់នៅមុននេះ ឲ្យត្រៀមភៀសខ្លួនចេញភ្លាមៗ ខណៈដែលចំហេះព្រៃដ៏ធំមួយបានឆាបឆេះទៅកាន់តែកៀកនឹងទីក្រុងរុករករ៉ែមួយនេះ។

អ្នកស្រុកនៅទីប្រជុំជនដាច់ស្រយាលមួយចំនួនផ្សេងទៀត និងសហគមន៍ជនជាតិដើមភាគតិច ក៏ត្រូវបានប្រាប់ឲ្យចាកចេញដែរ។ អ្នកជម្លៀសភាគច្រើនត្រូវបានគេរំពឹងថា នឹងដឹកជញ្ជូនទៅកាន់រដ្ឋធានី Winnipeg របស់ខេត្ត Manitoba៕