អ៊ីស្រាអែល កាលពីថ្ងៃពុធ (ទី២៨ ខែឧសភា) បានចោទប្រកាន់អង្គការសហប្រជាជាតិ (UN) ថា កំពុងព្យាយាម «រារាំង» ការចែកចាយជំនួយ នៅតំបន់ហ្កាហ្សា ខណៈដែលស្ថាប័នពិភពលោកមួយនេះ បានប្រាប់ថា ខ្លួនកំពុងប្រឹងប្រែងយ៉ាងអស់ពីសមត្ថភាព ដើម្បីប្រមូលជំនួយមានកម្រិត ដែលត្រូវបានអនុញ្ញាតដោយអាជ្ញាធររបស់អ៊ីស្រាអែល។

ស្ថានភាពមនុស្សធម៌ នៅតំបន់ហ្កាហ្សា ជាកន្លែងដែលអ៊ីស្រាអែល បានដាក់ចេញនូវការរាំងខ្ទប់ជំនួយរយៈពេល ២ខែ គឺធ្ងន់ធ្ងរណាស់ ដោយអ្នកជំនាញសន្តិសុខស្បៀង បានប្រាប់ថា មនុស្សម្នាក់ ក្នុងចំណោម ៥នាក់ កំពុងជួបប្រទះភាពអត់ឃ្លាន។

ឯកអគ្គរដ្ឋទូតរបស់អ៊ីស្រាអែល ប្រចាំនៅ UN លោក Danny Danon បានប្រាប់ក្រុមប្រឹក្សាសន្តិសុខថា៖ «ខណៈពេលដែល UN ធ្វើឲ្យមានការភ័យស្លន់ស្លោ និងនិយាយនូវអ្វីដែលមិនពិត រដ្ឋអ៊ីស្រាអែលកំពុងសម្របសម្រួលឥតឈប់ឈរ ក្នុងការបញ្ចូនជំនួយចូលទៅកាន់តំបន់ហ្កាហ្សា»។

លោកបានប្រាប់ថា ក្រោយបញ្ជប់ការរាំងខ្ទប់ ជំនួយកំពុងចូលតាមរថយន្ត ក្រោមការអនុញ្ញាតមានកំណត់របស់អ៊ីស្រាអែល នៅច្រក Kerem Shalom តាំងពីសប្តាហ៍មុន និងតាមរយៈ «យន្តការចែកចាយថ្មីដែលត្រូវបានបង្កើតឡើងដោយការសម្របសម្រួលជាមួយសហរដ្ឋអាមេរិក និងដៃគូអន្តរជាតិសំខាន់ៗ»។

លោក Danon កំពុងសំដៅទៅលើមូលនិធិមនុស្សធម៌ហ្កាហ្សា (GHF) ជាក្រុមជំនួយឯកជនគាំទ្រដោយសហរដ្ឋអាមេរិក ដែលបានបង្កើតប្រព័ន្ធចែកចាយផ្ទាល់ខ្លួន ជាអ្វីដែល UN ចាត់ទុកថា ផ្ទុយនឹងគោលការណ៍មនុស្សធម៌របស់ខ្លួន។ ការចែកចាយជំនួយដ៏ច្របូកច្របល់ នៅមជ្ឈមណ្ឌល GHF កាលពីថ្ងៃទី២៧ ខែឧសភា បានធ្វើឲ្យមនុស្ស ៤៧នាក់រងរបួស។

អ្នកនាំពាក្យរបស់អគ្គលេខាធិការ UN លោក Antonio Guterres គឺលោក Stephane Dujarric បានប្រាប់សារព័ត៌មាន AFP ថា៖ «មិនមានភាពខុសគ្នា រវាងបញ្ជីបច្ចុប្បន្ន និងបញ្ជី មុនពេលចាប់ផ្តើមប្រតិប្តិការ GHF»។ ហើយ UN បានអះអាងជាថ្មីពីការប្រឆាំងរបស់ខ្លួន ចំពោះការសម្របសម្រួលជាមួយ GHF ដោយលោក Dujarric បានទទូចថា៖ «យើងនឹងមិនចូលរួមក្នុងប្រតិបត្តិការដែលមិនស្របតាមគោលការណ៍មនុស្សធម៌របស់យើងទេ»៕