វិទ្យាស្ថានសម្រាប់ការស្រាវជ្រាវ និងការអនុវត្តការទប់ស្កាត់គ្រឿងញៀនរបស់វៀតណាម ដែល​ហៅ​កា​ត់ថា PSD បានសន្យា​បន្ត​កិច្ច​សហ​ប្រតិបត្តិការ​ជាមួយ​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​​កម្ពុជា លើការងារបន្សាប ព្យាបាល និងស្តានិតិសម្បទាឲ្យកាន់តែខ្លាំងក្លាបន្ថែមទៀត ដើម្បី​ធ្វើ​យ៉ាង​ណាកសាងធនធានមនុស្ស ចូលក្នុងសង្គមវិញ។

នៅក្នុងកិច្ចជំនួបជាមួយ ឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្ដ្រី និង​ជា​ប្រធាន​អាជ្ញាធរ​ជាតិប្រយុទ្ធប្រឆាំងគ្រឿងញៀន នៅព្រឹកថ្ងៃទី២៩ ខែឧសភា ឆ្នាំ២០២៥នេះ លោក​បណ្ឌិត LE TRUNG TUAN ប្រធានក្រុមប្រឹក្សាស្ថាបនិកនៃPSDគ្រុប និង​ជា​ប្រធាន​ក្រុម​ប្រឹក្សា​គ្រប់​គ្រង នៃវិទ្យាស្ថាន PSD សម្រាប់ការស្រាវជ្រាវ និងការអនុវត្តការទប់ស្កាត់គ្រឿងញៀន ប្រទេស​វៀតណាម PSD គ្រុបត្រូវបានបង្កើតឡើងចាប់តាំងពីឆ្នាំ២០១៣ ហើយ PSD បាន​ធ្វើ​ការ​ស្រាវ​ជ្រាវ និងវិធីសាស្ត្រក្នុងការងារបន្សាបព្យាបាល និងស្តារនីតិសម្បទា​អ្នក​ញៀន​គ្រឿង​ញៀន​ និង​ត្រូវ​បាន​ទទួលស្គាល់ពីរដ្ឋាភិបាលប្រទេសវៀតណាមលើការងាររបស់ខ្លួន រហូតរដ្ឋាភិបាល​វៀតណាម​ឲ្យ​ជួយលើការពាក់ព័ន្ធនឹងគ្រឿងញៀនក្នុងប្រទេសវៀតណាម។

នៅចំពោះមុខប្រធានអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា LE TRUNG TUAN បាន​បង្ហាញ​នូវ​ការគាំទ្រ និងឯកភាពចំពោះការលើកឡើងរបស់ឯកឧត្តមសន្ដិបណ្ឌិត ឧបនាយករដ្ឋ​មន្ត្រី ពាក់ព័ន្ធនឹងបញ្ហាគ្រឿងញៀននៅកម្ពុជា លោកសន្យាថា នឹងផ្គត់ផ្គង់រាល់ឯកសារទាំងអស់ ដែល​ពាក់ព័ន្ធការស្រាវជ្រាវរបស់វិទ្យាស្ថាន PSD របស់វៀតណាម មកឲ្យ​អាជ្ញាធរ​ជាតិ​ប្រយុទ្ធ​ប្រឆាំ​ង​គ្រឿងញៀន ដើម្បីជាទុនទុកក្នុងការប្រើប្រាស់ក្នុងការងារបន្សាប ព្យាបាល និងស្តារ​នីតិ​សម្បទា​អ្នក​ញៀន​គ្រឿងញៀន។

ថ្លែងនៅក្នុងកិច្ចជំនួបនោះដែរ ឯកឧត្តមសន្ដិបណ្ឌិត នេត សាវឿន បានបង្ហាញ​អំពី​ជំហរ​បស់​រាជ​រដ្ឋាភិបាល​កម្ពុជា​ក្នុងអាណត្តិថ្មីនេះ ដែលផ្ដល់អាទិភាពលើការងារប្រយុទ្ធប្រឆាំងគ្រឿងញៀន ក្នុង​នោះ​បាន​រៀបចំរចនាសម្ព័ន្ធក្បាលម៉ាស៊ីនដឹកនាំការងារប្រយុទ្ធប្រឆាំងគ្រឿងញៀន និងដាក់​ចេញ​គោល​នយោបាយមុតស្រួច ព្រមទាំងវិធីសាស្ដ្រនានា ដើម្បីឲ្យការងារប្រយុទ្ធប្រឆាំងគ្រឿងញៀន កាន់​តែ​មានប្រសិទ្ធភាព និងស័ក្ដិសិទ្ធិភាព។

ឯកឧត្តម​សន្ដិបណ្ឌិតបានលើកឡើងទៀតថា ក្នុងរយៈពេល៥ខែដើមឆ្នាំ២០២៥នេះ បើទោះបី​កម្ពុជា​មាន​បញ្ហាប្រឈមមួយចំនួនក៏ដោយ ប៉ុន្ដែអាជ្ញាធរជាតិប្រយុទ្ធប្រឆាំងគ្រឿងញៀន ក៏​ដូច​ជា​រាជ​រដ្ឋាភិបាលកម្ពុជា បានប្រើប្រាស់គ្រប់វិធានការសំខាន់នានា រួមមានវិធានការទប់ស្កាត់ ការ​លើក​កម្ពស់​ការផ្សព្វផ្សាយអប់រំ និងវិធានការច្បាប់យ៉ាងមុតស្រួចគ្មានការលើកលែង ដែល​ធ្វើ​ឲ្យ​បញ្ហា​គ្រឿង​ញៀននៅកម្ពុជាបច្ចុប្បន្នមានការថមថយផងដែរ។

យ៉ាងណាក៏​ដោយ ការងារប្រយុទ្ធប្រឆាំងគ្រឿងញៀននេះ ឧបនាយករដ្ឋមន្ដ្រី នេត សាវឿន យល់​ឃើញ​ថា ទាមទារឲ្យមានកិច្ចសហការបន្ថែម ពិសេសការចូលរួមរបស់វិស័យឯកជន ដើម្បី​វិនិយោគ​លើ​ការផ្សព្វផ្សាយអប់រំឲ្យបានទូលំទូលាយ និងមានការចាប់អារម្មណ៍ ទាន់សម័យ ព្រម​ទាំង​ការ​ព្យាបាល ស្ដារនីតិសម្បទាឲ្យមានប្រសិទ្ធភាព សំដៅកសាងធនធានមនុស្ស ចូលក្នុងសង្គមវិញ។ ដូច្នេះតាមរយៈជំនួបជាមួយវិទ្យាស្ថាន PSD ជាផ្នែកមួយសំខាន់ ដើម្បីឲ្យ​អាជ្ញាធរ​ជាតិ​ប្រយុទ្ធប្រឆាំងគ្រឿងញៀន អាចពង្រីកដៃគូសហការចូលរួម លើការងារប្រយុទ្ធ​ប្រឆាំង​គ្រឿងញៀននេះ៕ អត្ថបទ៖ បាន ចក់