ការវាយប្រហារជាបន្តបន្ទាប់នៅភាគខាងជើងប្រទេសម៉ូសំប៊ិក ក្នុងខែនេះ បានបង្ហាញពីការផ្ទុះឡើងនៃអំពើហិង្សាដោយក្រុមសកម្មប្រយុទ្ធដេស(Daesh) ខណៈពេលដែលក្រុមហ៊ុនថាមពលយក្ស Total Energies រៀបចំ ដើម្បីបន្តគម្រោងឧស្ម័នដ៏ធំមួយ។

ក្រុមនេះ បានវាយប្រហារភេរវកម្ម នៅភាគខាងជើងប្រទេសម៉ូសំប៊ិក អស់ជាច្រើនឆ្នាំ មុនពេលប្តេជ្ញាយ៉ាងម៉ឺងម៉ាត់ នៅឆ្នាំ ២០២០ ដើម្បីប្រែក្លាយខេត្ត Cabo Delgado ដែលសម្បូរឧស្ម័ននៅភាគខាងជើង ទៅជារដ្ឋកាលីហ្វ។

ក្រុមហ៊ុន TotalEnergies បានផ្អាកគម្រោងឧស្ម័នធម្មជាតិរាវដែលមានតម្លៃរាប់ពាន់លានដុល្លារ នៅទីនោះ ក្នុងឆ្នាំ ២០២១ បន្ទាប់ពីរលកនៃការវាយឆ្មក់បង្ហូរឈាម ដែលបានបង្ខំមនុស្សជាងមួយលាននាក់ ឲ្យភៀសខ្លួន។

ការបះបោរនេះ ត្រូវបានជំរុញឲ្យកាន់តែធ្ងន់ធ្ងរឡើង ដោយភាពចលាចលរយៈពេលមួយខែ ដែលបានកើតឡើង បន្ទាប់ពីការបោះឆ្នោត នៅក្នុងខែតុលា។

ប៉ុន្តែមានរលកថ្មីនៃអំពើហិង្សា។ កាលពីខែឧសភា ក្រុមឥស្លាមនិយម បានវាយប្រហារទីតាំងយោធាចំនួនពីរ ដោយអះអាងថា បានសម្លាប់ទាហាន ១១នាក់ នៅលើកដំបូង និង ១០នាក់ នៅក្នុងលើកទី២។

អ្នកជំនាញផ្នែកសន្តិសុខ បានបញ្ជាក់ពីការវាយប្រហារលើកដំបូង ហើយបានធ្វើឲ្យចំនួនអ្នកស្លាប់កើនដល់ ១៧នាក់។ ពុំមានការអត្ថាធិប្បាយពីកងកម្លាំងសន្តិសុខម៉ូសំប៊ិកទេ។