ប្រធានាធិបតីអ៊ូហ្គង់ដាលោក Yoweri Museveni និងសមភាគីប៊ូរុនឌីលោក Evariste Ndayishimiye បានជំរុញឲ្យបញ្ចប់ការជ្រៀតជ្រែកបរទេសក្នុងជម្លោះនៅភាគខាងកើតសាធារណរដ្ឋប្រជាធិបតេយ្យកុងហ្គោ ដោយពួកគេព្រមានថា វាបង្កហានិភ័យធ្វើឲ្យអស្ថិរភាពដល់តំបន់ធំជាងនេះ ។

ថ្លែងអំឡុងកិច្ចប្រជុំកំពូល Great Lakes របស់ក្រុមរដ្ឋមន្រ្តីការបរទេសមកពីប្រទេសដែលបានចុះហត្ថលេខាលើគម្រោងកិច្ចសហប្រតិបត្តិការ សន្តិភាព និងសន្តិសុខសម្រាប់សាធារណរដ្ឋប្រជាធិបតេយ្យកុងហ្គោ និងតំបន់ លោក Museveni និយាយថា នយោបាយត្រូវការ ដើម្បីដោះស្រាយវិបត្តិ ។

លោកបន្តថា ពួកយើងដឹងថាអ្វីជាបញ្ហា ហើយវាអាចដោះស្រាយបាន ប៉ុន្តែពួកយើងត្រូវតែមានឆន្ទៈផ្នែកនយោបាយ ។ ជនបរទេសត្រូវតែកំណត់ការជាប់ពាក់ព័ន្ធរបស់ពួកគេ ហើយពួកគេមានតែជំរុញអ្នកបង្កើតកំហុសប៉ុណ្ណោះ ។

ដោយឡែក លោក Ndayishimiye និយាយថា ជម្លោះកាន់តែអាក្រក់ទៅ ហើយអាចរីករាលដាលហួសកុងហ្គោ ។ ដូចអ្វីដែលោកបាននិយាយអញ្ចឹង សង្រ្គាមឆាបឆេះនៅតំបន់ភាគខាងកើតកុងហ្គោ នឹងឈានដល់កម្រិតកំពូល ហើយក្រុមប្រដាប់អាវុធបរទេសនឹងទទួលបានគុណសម្បត្តិពីការគាំទ្ររបស់ប្រទេសមួយចំនួន ដូចជារ៉្វាន់ដា ពួកគេចាំតែមើល ដើម្បីទទួលបានគុណសម្បត្តិពីស្ថានភាពមួយនេះប៉ុណ្ណោះ ។

នៅតំបន់ភាគខាងកើតកុងហ្គោ បានមើលឃើញការហក់ឡើងខ្ពស់អំពើហិង្សា ចាប់តាំងពីដើមឆ្នាំ ២០២៥នេះរហូតមក ពេលដែលក្រុមឧទ្ទាម M23គាំទ្រដោយរ៉្វាន់ដា រឹបអូស និងកាន់កាប់ទីក្រុងជាច្រើននៅខេត្ត North Kivu និងខេត្ត South Kivu ។

ស្របពេលដែលអង្គការសហប្រជាជាតិ(UN) និងរដ្ឋាភិបាលលោកខាងលិចធ្លាប់បានបញ្ជាក់កាលពីមុនថា ប្រទេសរ៉្វាន់ដា បានផ្តល់អាវុធ និងទាហានដល់ក្រុមឧទ្ទាម M23 ប្រទេសរ៉្វាន់ដា បានច្រានចោលការគាំទ្រក្រុមចលនា M23 ហើយពួកគេនិយាយថា យោធារបស់ខ្លួនធ្វើ ដើម្បីការពារខ្លួនប្រឆាំងនឹងកងទ័ពកុងហ្គោ និងក្រុមជីវពលដែលត្រូវបានបានបង្កើតឡើងដោយជនល្មើសនៃអំពើប្រល័យពូជសាសន៍ឆ្នាំ ១៩៩៤ ៕