ខេត្ត Manitoba បានប្រកាសដាក់រដ្ឋក្នុងគ្រាអាសន្ន និងជំរុញឲ្យមនុស្សរាប់ម៉ឺននាក់ជម្លៀសខ្លួនចេញពីតំបន់ភាគខាងជើង និងតំបន់ភាគខាងកើតខេត្តមួយនេះ ស្របពេលដែលភ្លើងឆេះព្រៃរីករាលដាលកាន់តែខ្លាំងនៅតំបន់ភាគកណ្តាល និងតំបន់ភាគខាងលិចប្រទេសកាណាដា ។

អភិបាលខេត្ត Manitoba លោក Wab Kinew និយាយនៅក្នុងសន្និសីទសារព័ត៌មានថា មនុស្ស ១៧.០០០នាក់ ត្រូវការជម្លៀសចេញឲ្យបានឆាប់រហ័សតាមដែលអាចធ្វើទៅបាន រួមទាំងពលរដ្ឋនៅទីក្រុង Flin Flonផងដែរ ។ 

លោកបន្តថា អ្នកដែលត្រូវជម្លៀសចេញ ត្រូវជ្រកកោនបណ្តោះអាសន្ននៅលើទីលានបាល់ទាត់ មជ្ឈមណ្ឌលសហគមន៍នៅទីក្រុង Winnipeg និងទីក្រុងផ្សេងទៀត ហើយកងកម្លាំងប្រដាប់អាវុធសហព័ន្ធ បានធ្វើដំណើរមកដល់ ដើម្បីជួយដឹកជញ្ជូនអ្នកជម្លៀសខ្លួន ។

លោក Kinew បាននិយាយនៅក្នុងសេចក្តីថ្លែងការណ៍ថា នេះគឺជាការជម្លៀសខ្លួនមនុស្សទ្រង់ទ្រាយធំបំផុតនៅក្នុងប្រវត្តិសាស្រ្តនាសម័យទំនើបនៅក្នុងខេត្ត ហើយវាត្រូវការធនធានសំខាន់ៗជាច្រើន និងកិច្ចសហប្រតិបត្តិការពីគ្រប់កម្រិតរបស់រដ្ឋាភិបាល ។

ដោយឡែក ភ្លើងឆេះព្រៃនៅខេត្ត Alberta បានបង្ខំឲ្យមានការបិទបណ្តោះអាសន្នការផលិតប្រេង និងឧស្ម័នមួយចំនួន ហើយនិងបង្ខំឲ្យអ្នកស្រុកជម្លៀសខ្លួនចេញពីទីក្រុងតូចមួយផងដែរ ៕