សង្គ្រាមពាណិជ្ជកម្មរបស់ប្រធានាធិបតីអាមេរិក លោក Donald Trump បានធ្វើឱ្យក្រុមហ៊ុននានាទូទាំងពិភពលោក ខាតបង់ប្រាក់ច្រើនជាង ៣៤ពាន់លានដុល្លារ ក្នុងការលក់ និងការចំណាយខ្ពស់ជាងមុន នេះបើយោងតាមការវិភាគរបស់សារព័ត៌មានរ៉យទ័រនៃការលាតត្រដាងរបស់ក្រុមហ៊ុន ដែលនេះជាការខូចខាតដែលត្រូវបានរំពឹងថានឹងបន្តកើនឡើងយ៉ាងអាក្រក់ ខណៈភាពមិនប្រាកដប្រជាកំពុងបន្តលើពន្ធ បានប៉ះពាល់ការសម្រេចចិត្តនៅក្រុមហ៊ុនធំៗមួយចំនួនរបស់ពិភពលោក។

នៅទូទាំងសហរដ្ឋអាមេរិក អាស៊ី និងអឺរ៉ុប បានមើលឃើញថា ក្រុមហ៊ុននានារួមទាំង Apple ក្រុមហ៊ុនរថយន្ត Ford ព្រមទាំងបណ្ដាញបច្ចេកវិទ្យាចម្រុះខ្នាតយក្ស Porsche និង Sony បានដកចេញ ឬកាត់បន្ថយការព្យាករប្រាក់ចំណេញរបស់ពួកគេ ហើយស្ថាប័នជាច្រើននិយាយថា ភាពមិនទៀងទាត់នៃគោលនយោបាយពាណិជ្ជកម្មលោក Trump ធ្វើឱ្យពួកគេមិនអាចប៉ាន់ស្មានការចំណាយបានត្រឹមត្រូវ។

សារព័ត៌មានរ៉យទ័រ បានពិនិត្យសេចក្តីថ្លែងការណ៍របស់ក្រុមហ៊ុន ឯកសារនិយតកម្ម សន្និសីទ និងឯកសារតាមប្រព័ន្ធផ្សព្វផ្សាយ ដើម្បីបូកសរុបជាលើកដំបូងនូវរូបភាពនៃការបំផ្លិចបំផ្លាញរបស់ពន្ធគយ រហូតមកដល់ពេលនេះ សម្រាប់អាជីវកម្មសកល។ ក្នុងចំណោមការខាងបង់ទាំងអស់ តួលេខ ៣៣ពាន់លានដុល្លារគឺជាផលបូកនៃការប៉ាន់ស្មានពីក្រុមហ៊ុនសកលចំនួន៣២ នៅក្នុងសម្ព័ន្ធអាមេរិក S&P 500 និងក្រុមហ៊ុនចំនួនបីមកពី STOXX 600 របស់អឺរ៉ុប ព្រមទាំង ២១ក្រុមហ៊ុននៅក្នុងបណ្ដាញ Nikkei 225 របស់ជប៉ុន។

ក្រុមសេដ្ឋវិទូនិយាយថា ការចំណាយសម្រាប់អាជីវកម្ម ទំនងជាកើនឡើងច្រើនដងលើសពីអ្វីដែលក្រុមហ៊ុនបានបង្ហាញរហូតមកដល់ពេលនេះ។ លោក Jeffrey Sonnenfeld សាស្រ្តាចារ្យនៅសាលាគ្រប់គ្រង Yale របស់អាមេរិក បានព្រមានថា ផលប៉ះពាល់នៃរលកពន្ធអាចកាន់តែអាក្រក់ទៅៗ ដោយលើកឡើងពីសក្តានុពលនៃការចំណាយទាបពីអ្នកប្រើប្រាស់ និងអាជីវកម្ម ការរំពឹងទុកនៃអតិផរណាកាន់តែខ្ពស់៕