ប្រជាជនប៉ាឡេស្ទីនរាប់ពាន់នាក់ដែលស្រេកឃ្លានយ៉ាងអស់សង្ឃឹម បានសម្រុកចូលទៅក្នុងឃ្លាំងជំនួយរបស់អង្គការសហប្រជាជាតិ នៅភាគកណ្តាលតំបន់ហ្កាហ្សា កាលថ្ងៃពុធ (២៨ ឧសភា) សប្ដាហ៍នេះ ដោយកម្មវិធីស្បៀងអាហារពិភពលោក WFP បានរាយការណ៍ពីការស្លាប់ជាច្រើននៅក្នុងភាពចលាចលនេះ ខណៈវិបត្តិភាពអត់ឃ្លានកាន់តែធ្ងន់ធ្ងរឡើង។

ស្ថានការណ៍មនុស្សធម៌នៅហ្កាហ្សា ដែលទីបំផុតជំនួយបានចាប់ផ្តើមទៅដល់បន្ទាប់ពីការបិទផ្លូវរយៈពេលពីរខែ គឺធ្ងន់ធ្ងរខ្លាំង បន្ទាប់ពីសង្គ្រាមដ៏បំផ្លិចបំផ្លាញជាង ១៨ខែ។ ក្រុមអ្នកជំនាញសន្តិសុខស្បៀង ព្រមានថា ភាពអត់ឃ្លានដ៏អាក្រក់កំពុងកើតមានលើមនុស្សម្នាក់ក្នុងចំណោម ៥នាក់ នៅទីនោះ។

ខ្សែវីដេអូពីប្រព័ន្ធផ្សព្វផ្សាយ បានបង្ហាញពីហ្វូងជនជាតិប៉ាឡេស្ទីនរាប់ពាន់នាក់ បានសម្រុកចូលទៅក្នុងឃ្លាំង WFP ក្នុងទីក្រុង Deir Al-Balah ហើយលួចយកស្បោងស្បៀងអាហារសង្គ្រោះបន្ទាន់ នៅពេលមានស្នូរកាំភ្លើងផ្ទុះឡើង។

ទោះបីជាអ៊ីស្រាអែល បានប្រកាសបន្ធូរបន្ថយការបិទផ្លូវរបស់ខ្លួនលើហ្កាហ្សា ដើម្បីអនុញ្ញាតឱ្យមានការផ្តល់ជំនួយមានកម្រិតក៏ដោយ ក៏អ្នកស្រុកនៅតំបន់ភាគខាងជើង រួមទាំងទីក្រុងហ្កាហ្សា បានត្អូញត្អែរថា ពួកគេមិនទាន់បានទទួលជំនួយគ្រប់គ្រាន់ឡើយមកទល់ពេលនេះ។

អ្នកឃ្លាំមើលភាពអត់ឃ្លានសកល IPC បានព្រមានម្ដងហើយម្ដងទៀតថា ពលរដ្ឋហ្កាហ្សា កន្លះលាននាក់ ប្រឈមមុខនឹងភាពអត់ឃ្លានធ្ងន់ធ្ងរបំផុត ខណៈហានិភ័យដ៏អាក្រក់នៃគ្រោះទុរ្ភិក្សជាមួយនឹងកម្រិតខ្ពស់បំផុត អាចកើតឡើងនៅចុងខែកញ្ញា ខាងមុខនេះ បើសិនជំនួយនៅតែមិនគ្រប់គ្រាន់៕