ក្រុមអ្នកពន្លត់អគ្គិភ័យ បានប្រញាប់ប្រញាល់ចេញទៅគ្រប់គ្រងចំហេះព្រៃឆេះរាលដាលនៅទីក្រុង Churchill Falls ប្រទេសកាណាដា កាលពីថ្ងៃព្រហស្បតិ៍ ខណៈអាជ្ញាធរបានព្រមានអ្នកស្រុកឱ្យប្រុងប្រយ័ត្នក្នុងពេលរដូវភ្លើងឆេះព្រៃនៅខេត្ត Newfoundland និងខេត្ត Labrador ភាគឦសានប្រទេស។

អាជ្ញាធរ និយាយថា ក្រុមបុគ្គលិក និងយន្តហោះទម្លាក់គ្រាប់បែកទឹកពីរគ្រឿង ត្រូវបានដាក់ពង្រាយដើម្បីពន្លត់អណ្តាតភ្លើង ដែលត្រូវបានគេប៉ាន់ស្មានថាឆេះលើផ្ទៃដីទំហំ១៧០ហិកតា និងស្ថិតនៅចម្ងាយត្រឹមតែ១គីឡូម៉ែត្រ ភាគខាងកើតទីក្រុង Churchill Falls។

ទូរទស្សន៍ក្នុងស្រុក CBC ដែលដកស្រង់សម្តីរបស់នាយកកម្មវិធីគ្រប់គ្រងចំហេះព្រៃរបស់ក្រសួងព្រៃឈើ លោក Craig Coady បាននិយាយថា ហានិភ័យចំពោះទីក្រុងChurchill Falls កំពុងថយចុះ ប៉ុន្តែបាននិយាយថា អគ្គិភ័យនៅតែត្រូវបានចាត់ទុកថានៅពុំទាន់អាចគ្រប់គ្រងបាន ដោយសារតែអាកាសធាតុក្តៅស្ងួត។

នៅកន្លែងផ្សេងទៀត ទីក្រុងManitoba បានប្រកាសស្ថានភាពរដ្ឋក្នុងគ្រាអាសន្ន និងបានជំរុញឲ្យមនុស្សរាប់ពាន់នាក់នៅភាគខាងជើង និងភាគខាងកើតខេត្ត ជម្លៀសខ្លួនចេញ ដោយសារចំហេះព្រៃបានឆេះរាលដាលនៅភាគកណ្តាល និងភាគខាងលិចប្រទេសកាណាដា។