ក្រសួងហិរញ្ញវត្ថុរបស់ប្រទេសអ៊ីស្រាអែល កាលពីយប់ថ្ងៃព្រហស្បតិ៍ បានបន្ទាបការព្យាករណ៍កំណើនរបស់ខ្លួនសម្រាប់ឆ្នាំ២០២៥ មកនៅត្រឹម៣,៦ភាគរយ ពី៤,៣ភាគរយ ដែលត្រូវបានព្យាករ កាលពីខែមករា។

ក្រសួង បានពន្យល់ថា សេណារីយ៉ូមូលដ្ឋាននៃការព្យាករណ៍កាលពីពេលមុនត្រូវបានសន្មត់ថាមានការថយចុះការប្រយុទ្ធគ្នា និងការជ្រើសរើសយោធាក្នុងឆ្នាំបច្ចុប្បន្ន ប៉ុន្តែនេះពុំទាន់បានបង្ហាញជាក់ស្តែងនៅឡើយ រហូតមកដល់ពេលនេះ។

សេណារីយ៉ូ ដែលបានពិនិត្យឡើងវិញ រំពឹងថានឹងមានការកែណ្ឌកងកម្លាំងបម្រុងបន្ថែមទៀតសម្រាប់ប្រតិបត្តិការប្រយុទ្ធនៅក្នុងត្រីមាសទីពីរនៃឆ្នាំ២០២៥ បន្ទាប់មកកាត់បន្ថយជាបន្តបន្ទាប់ក្នុងការជ្រើសរើសបុគ្គលិកបម្រុង ដែលចាប់ផ្តើមតែនៅក្នុងត្រីមាសទីបី ប៉ុណ្ណោះ។

ការព្យាករណ៍ថ្មី ក៏នឹងលើកយកមកពិចារណាពីផលប៉ះពាល់នៃគោលនយោបាយពន្ធនាំចូលថ្មីរបស់សហរដ្ឋអាមេរិក និងទិន្នន័យផ្លូវការថ្មីៗស្តីពីសកម្មភាពសេដ្ឋកិច្ចរបស់ប្រទេសអ៊ីស្រាអែលផងដែរ។ ក្រសួងរបស់អ៊ីស្រាអែល សន្មតថា ការដំឡើងពន្ធរបស់សហរដ្ឋអាមេរិកនឹងនាំឱ្យមានការថយចុះប្រហែលពីរភាគរយ ក្នុងពាណិជ្ជកម្មសកល ឆ្នាំ២០២៥ និងឆ្នាំ២០២៦។

លោក Gad Lior អ្នកវិភាគជាន់ខ្ពស់នៅសារព័ត៌មាន Yedioth Ahronoth និយាយថា ការកាត់បន្ថយការព្យាករណ៍កំណើន និងការកើនឡើងអតិផរណារបស់អ៊ីស្រាអែលដែលមានទំហំច្រើនជាងការរំពឹងទុកនាពេលថ្មីៗនេះ ត្រូវបានគេរំពឹងថានឹងនាំទៅរកការធ្លាក់ចុះសកម្មភាពសេដ្ឋកិច្ច និងប៉ះពាល់ដល់ចំណូលពន្ធ រួមជាមួយនឹងការកើនឡើងនៃការចំណាយរបស់រដ្ឋាភិបាល។