អាជ្ញាធរប្រទេសស្វីស បាននិយាយកាលពីថ្ងៃព្រហស្បតិ៍ (២៩ ឧសភា) ថា គំនរថ្ម និងបំណែកដុំទឹកកកពីផ្ទាំងទឹកកកដ៏ធំ ដែលបានបាក់រលំសង្កត់លើភូមិមួយកន្លែង កំពុងរារាំងសេវាសង្គ្រោះបន្ទាន់មិនឱ្យដំណើរការ ប៉ុន្តែពួកគេមានសុទិដ្ឋិនិយមថា ពុំមានលំនៅឋានអ្នកស្រុកណាមួយមានគ្រោះថ្នាក់ទៀតទេ។

ផ្ទាំងទឹកកកដែលគេឱ្យឈ្មោះថា Birch នៅតំបន់ Valais ភាគខាងត្បូងនៃប្រទេសស្វីស បានបាក់រលំកាលពីថ្ងៃពុធ ដោយបានបញ្ជូនដុំថ្ម ទឹកកក និងបំណែកបែកបាក់ ចុះទៅលើជម្រាលភ្នំ និងធ្លាក់ចូលទៅជ្រលងភ្នំខាងក្រោម ដោយបំផ្លាញភាគច្រើនបំផុតនៃភូមិ Blatten ជាជម្រករបស់មនុស្ស ៣០០នាក់ ហើយត្រូវបានជម្លៀសចេញកាលពីសប្តាហ៍មុន ដោយសារតែគ្រោះថ្នាក់ដែលជិតមកដល់។

បុរសវ័យ ៦៤ឆ្នាំម្នាក់ ដែលគេជឿថាស្ថិតក្នុងតំបន់គ្រោះថ្នាក់នៅពេលនោះ នៅតែបាត់ខ្លួន ខណៈអ្នកនាំពាក្យនគរបាលបាននិយាយថា លក្ខខណ្ឌលំបាកបានបង្ខំឱ្យការស្វែងរកត្រូវបានផ្អាកកាលពីថ្ងៃព្រហស្បតិ៍។

ក្រុមមន្ត្រីបានប្រាប់សន្និសីទសារព័ត៌មានមួយថា សណ្ឋានដីភ្នំដែលមិនរាបស្មើ និងកម្ទេចកម្ទីថ្មរាប់ពាន់តោន ក៏បានធ្វើឱ្យបុគ្គលិកសង្គ្រោះបន្ទាន់ មិនអាចធ្វើអន្តរាគមន៍ដើម្បីរក្សាលំនឹងនៅតំបន់រងគ្រោះ និងទប់ទល់នឹងហានិភ័យនៃទឹកជំនន់នៅជ្រលងភ្នំខាងក្រោមបានទេ។ បន្ទាប់ពីការព្រមានដំបូងពីទឹកជំនន់ដែលអាចបំផ្លិចបំផ្លាញយ៉ាងមហន្តរាយ អាជ្ញាធរនិយាយថា ការវិភាគអ្នកជំនាញបានបង្ហាញថា ហានិភ័យបានធូរស្រាលហើយ៕