ក្រុមអ្នកវិទ្យាសាស្ត្រចិន បានបង្កើតសម្ភារៈយោធាថ្មីដែលអាចនាំទៅដល់មីស៊ីលបំបាំងកាយ និងយន្តហោះចម្បាំងដ៏ទំនើប។ បច្ចេកវិទ្យារបស់ទីក្រុងប៉េកាំងទាំងនេះ អាចប៉ះពាល់ដល់ប្រសិទ្ធភាពនៃប្រព័ន្ធការពារមីស៊ីលរបស់សហរដ្ឋអាមេរិក រួមទាំងខែលប្រឆាំងមីស៊ីល "Golden Dome" របស់លោកប្រធានាធិបតី Donald Trump ផងដែរ។

សហរដ្ឋអាមេរិក កំពុងបារម្ភពីកំណើននៃការស្តុកទុកមីស៊ីលអន្តរទ្វីប (ICBM) របស់ចិន និងរុស្ស៊ី ដែលមានអាវុធនុយក្លេអ៊ែរ រួមទាំងមីស៊ីលលឿនជាងសំឡេង។ ឃ្លាំងអាវុធទាំងនេះត្រូវបានគេរំពឹងថានឹងមានសមត្ថភាពកាន់តែខ្លាំងក្លាក្នុងប៉ុន្មានឆ្នាំខាងមុខ។

លោក Trump បានបញ្ជាឱ្យចាប់ផ្តើមការងារនៅលើ Golden Dome ដែលជាខែលមីស៊ីលមានមូលដ្ឋានលើផ្កាយរណប តម្លៃ ១៧៥ពាន់លានដុល្លារ។ ទីក្រុងប៉េកាំងនិយាយថា ខ្លួនបារម្ភយ៉ាងខ្លាំងចំពោះគម្រោងនេះ ដែលត្រូវជំរុញដោយគំនិតផ្តួចផ្តើមការពារយុទ្ធសាស្ត្រ ស្នើឡើងដោយអតីតប្រធានាធិបតីអាមេរិក លោក Ronald Reagan ក្នុងទសវត្សរ៍ឆ្នាំ១៩៨០ អំឡុងសង្គ្រាមត្រជាក់។

ក្រុមស្រាវជ្រាវរបស់ចិន នៃសាកលវិទ្យាល័យ Zhejiang បានរៀបរាប់លម្អិតនៅក្នុងខែមីនាថា សម្ភារៈថ្មីរបស់ពួកគេត្រូវបង្កើតឡើងដើម្បីគេចចេញពីបច្ចេកវិទ្យារាវរកនៃរលកមីក្រូ និងអ៊ីនហ្វ្រារ៉េដ ដែលត្រូវបានប្រើប្រាស់យ៉ាងទូលំទូលាយនៅក្នុងការឃ្លាំមើលយោធាទំនើប ជាពិសេសរបស់សហរដ្ឋអាមេរិក សូម្បីតែនៅពេលប៉ះនឹងសីតុណ្ហភាពខ្ពស់ខ្លាំងក៏ដោយ រួមទាំងសមត្ថភាពជាច្រើនទៀត។

គេមិនទាន់ច្បាស់ទេថា តើសម្ភារៈថ្មីនេះនឹងត្រូវបំពាក់ក្នុងកងសព្វាវុធចិន ក្នុងពេលឆាប់ៗ ឬយ៉ាងណា។ លោក Trump និយាយថា Golden Dome របស់លោក នឹងត្រូវបាន "ដំណើរការពេញលេញ" នៅចុងបញ្ចប់នៃអាណត្តិទីពីរនៅឆ្នាំ២០២៩។ ប៉ុន្តែក្រុមអ្នកវិភាគផ្នែកការពារជាតិគិតថា ប្រព័ន្ធនេះមិនអាចត្រូវបានបញ្ចប់ក្នុងពេលកំណត់ ឬនៅក្រោមគម្រោងថវិកាចំនួន ១៧៥ពាន់លានដុល្លារ របស់ខ្លួនទេ៕