និស្សិតចិនដែលកំពុងសិក្សានៅសហរដ្ឋអាមេរិក កំពុងព្យាយាមស្វែងរកអនាគតរបស់ពួកគេ បន្ទាប់ពីរដ្ឋមន្ត្រីការបរទេសអាមេរិកលោក Marco Rubio បានប្រកាសកាលពីថ្ងៃពុធថា និស្សិតមួយចំនួន នឹងត្រូវដកហូតទិដ្ឋាការរបស់ពួកគេ។

យោងតាមសេចក្តីប្រកាសនោះ សហរដ្ឋអាមេរិក នឹងចាប់ផ្តើមដកហូតទិដ្ឋាការរបស់និស្សិតចិនមួយចំនួន រួមទាំងអ្នកដែលសិក្សានៅក្នុង «ផ្នែកសំខាន់» និង«អ្នកដែលមានទំនាក់ទំនងជាមួយគណបក្សកុម្មុយនីស្តចិន»។

ចិនគឺជាប្រទេសកំណើតធំជាងគេទី២សម្រាប់និស្សិតអន្តរជាតិ នៅក្នុងសហរដ្ឋអាមេរិក បន្ទាប់ពីប្រទេសឥណ្ឌា។ ក្នុងឆ្នាំសិក្សា ២០២២៣-២០២៤និស្សិតអន្តរជាតិជាង ២៧០.០០០នាក់ មកពីប្រទេសចិន ដែលស្មើនឹងមួយភាគបួននៃសិស្សបរទេសទាំងអស់ នៅក្នុងសហរដ្ឋអាមេរិក។

យុវជន Linqin ជានិស្សិតចិន នៅសកលវិទ្យាល័យ Johns Hopkins ដែលបានស្នើសុំឲ្យកំណត់អត្តសញ្ញាណត្រឹមតែឈ្មោះផ្ទាល់របស់ខ្លួន ដោយសារតែការភ័យខ្លាចចំពោះការសងសឹក បាននិយាយថា នេះគឺជា«កំណែថ្មីនៃច្បាប់លើកលែងតែជនជាតិចិន»។ និស្សិតរូបនេះ កំពុងសំដៅលើច្បាប់សតវត្សរ៍ទី ១៩ ដែលហាមឃាត់ជនជាតិចិន ពីការធ្វើអន្តោប្រវេសន៍ទៅកាន់សហរដ្ឋអាមេរិក និងបានហាមឃាត់ជនជាតិចិនដែលមានស្រាប់នៅក្នុងសហរដ្ឋអាមេរិកពីការទទួលបានសញ្ជាតិ។ លោក Linqin បាននិយាយថា ថ្ងៃពុធ គឺជាលើកទី១ ដែលលោកគិតអំពីការចាកចេញពីសហរដ្ឋអាមេរិក បន្ទាប់ពីចំណាយពេលមួយភាគបីនៃជីវិតរបស់ខ្លួន នៅទីនេះ។

និស្សិតអន្តរជាតិចិន គឺជាចំណុចនៃភាពតានតឹងរវាងសហរដ្ឋអាមេរិក និងប្រទេសចិន។

អ្នកនាំពាក្យក្រសួងការបរទេសចិន អ្នកស្រី Mao Ning បានហៅការសម្រេចចិត្តរបស់សហរដ្ឋអាមេរិកថា មិនសមហេតុផល។