អ្នកជំនាញផ្នែកច្បាប់ និងពាណិជ្ជកម្ម បានលើកឡើងថា វិធានការដំឡើងពន្ធជាសកលរបស់លោកប្រធានាធិបតីអាមេរិក Donald Trump អាចនឹងថយល្បឿន ប៉ុន្តែនឹងមិនត្រូវបានបញ្ឈប់ដោយសេចក្តីសម្រេចរបស់តុលាការ ដែលចុងក្រោយអាចបង្ខំឲ្យមានការផ្លាស់ប្តូរវិធីសាស្ត្រផ្នែកច្បាប់តែប៉ុណ្ណោះ សម្រាប់យុទ្ធនាការរបស់លោក ក្នុងការដាក់សម្ពាធលើប្រទេសនានាឲ្យព្រមសម្បទានពាណិជ្ជកម្ម។

ដំបូន្មានរបស់អ្នកជំនាញទាំងនោះ ចំពោះរដ្ឋាភិបាលបរទេស ក្រុមហ៊ុន និងអតិថិជនផ្សេងទៀត សន្មត់ថា លោក Trump នឹងមិនបោះបង់ចោលវិធានការពន្ធគយរបស់លោកនោះឡើយ ហើយថា គ្រប់យ៉ាងនឹងបន្តមានឡើងវិញក្នុងទម្រង់មួយ ឬផ្សេងទៀត។

សម្រាប់ពេលនេះ ការបញ្ជាឲ្យបញ្ឈប់បន្ទាន់ដោយសេចក្តីសម្រេចរបស់តុលាការពាណិជ្ជកម្មអន្តរជាតិ (CIT) ចំពោះវិធានការពន្ធរបស់លោក Trump ក្រោមច្បាប់ ស្តីអំពីសិទ្ធិអំណាចសេដ្ឋកិច្ចគ្រាអាសន្នអន្តរជាតិ (IEEPA) នឹងធ្វើឲ្យចំណាត់ការនោះនៅទ្រឹងសិន សម្រាប់ពេលបច្ចុប្បន្ន។

មេធាវី និងជាអ្នកជំនាញខាងពាណិជ្ជកម្មអាមេរិក-កាណាដា នៅក្រុមហ៊ុនច្បាប់ Thompson Hine ក្នុងទីក្រុង Columbus រដ្ឋ Ohio គឺលោក Dan Ujczo បាននិយាយថា៖ «នេះគ្រាន់តែជាចំណាត់ការដំបូងប៉ុណ្ណោះ។ រដ្ឋបាលរបស់លោក Trump មានជម្រើសជាច្រើន ក្នុងនោះរួមទាំងការរៀបចំឡើងវិញនូវក្រឹត្យ ដើម្បីរួមបញ្ចូលដែនកំណត់មួយចំនួន ដែលត្រូវបានប្រើនៅក្នុងការសម្រេចរបស់ CIT ផងដែរ»។

គួរបញ្ជាក់ថា កាលពីល្ងាចថ្ងៃទី២៨ ខែឧសភា តុលាការពាណិជ្ជកម្មដែលមានមូលដ្ឋាននៅតំបន់ Manhattan សហរដ្ឋអាមេរិក បានសម្រេចថា លោក Trump បានទៅហួសពីសិទ្ធិអំណាចផ្លូវច្បាប់របស់លោក ក្នុងការដាក់ចេញនូវវិធានការពន្ធក្រោមច្បាប់ IEEPA ជាច្បាប់បង្កើតឡើងក្នុងឆ្នាំ១៩៧៧ ដែលត្រូវបានប្រើជាចម្បង សម្រាប់ការដាក់ទណ្ឌកម្ម»៕