ភ្នំពេញ៖ ព្រះអង្គម្ចាស់នរោត្តម ចក្រាវុធ ព្រះប្រធានស្តីទីគណបក្សហ៊្វុនស៊ិនប៉ិច បានធ្វើការអំពាវនាវដល់សមាជិក សមាជិកា ព្រឹទ្ធាចារ្យគណបក្សទាំងអស់បញ្ឈប់ការលាបពណ៌ ច្រណែនឈ្នានីសគ្នាបន្តទៀត បើស្រលាញ់ និងមានឆន្ទៈពិតប្រាកដចំពោះគណបក្សហ៊្វុនស៊ិនប៉ិចមែននោះ។

នៅក្នុងពិធីចុះសំណេះ និងសួរសុខទុក្ខដល់សមាជិក-សមាជិកា គណបក្សនៅខេត្តកំពង់ធំ កាលពី ថ្ងៃទី១៩ ខែធ្នូ ម្សិលមិញ ព្រះអង្គម្ចាស់នរោត្តម ចក្រាវុធ បានមានបន្ទូលថា បើស្រលាញ់ហ្វ៊ុនស៊ិនប៉ិច និង ចង់ឲ្យគណបក្សដែលជាកេរ្តិ៍មរតករបស់សម្តេចតា សម្តេចតាទួត ព្រះបរមរតនកោដ្ឋ ឲ្យមានភាពល្អប្រសើ ឡើងវិញ នោះគប្បីបញ្ឈប់ការឈ្លោះគ្នា ញុះញង់ឲ្យមានការរើសអើងគ្នាទៅវិញទៅមក ខណៈវប្បធម៌បែប នេះបានកើតជាយូរណាស់មកហើយចំពោះគណបក្សមួយនេះ។

ព្រះអង្គម្ចាស់បានមានបន្ទួលថា«តាំងពីដើមមកខ្ញុំតែងតែឃើញ និងឮចំពោះថ្នាក់លើរបស់គណបក្សយើងឈ្លោះគ្នាជាច្រើនលើកច្រើនសារមកហើយ ហើយខ្ញុំតែងតែឆ្ងល់មូលហេតុអ្វីបានឈ្លោះគ្នារហូត យ៉ាងដូច្នេះ។ តែបើយើងរួបរួមគ្នាគណបក្សយើងនឹងល្អឡើងវិញ ដូចអ្វីដែលគណបក្សនេះបានកើតដំបូងអញ្ចឹង»។

នៅក្នុងពិធីសំណេះសំណាលនោះដែរ ព្រះអង្គម្ចាស់នរោត្តម ចក្រាវុធ ក៏មានការតាំងចិត្ត និងមានជំនឿជឿជាក់ក្នុងការ ដឹកនាំរបស់ព្រះអង្គចំពោះ គណបក្សហ្វ៊ុនស៊ិនប៉ិច ឲ្យមានភាពល្អប្រសើឡើងវិញផងដែរ ខណៈនាពេលបច្ចុប្បន្នគណបក្សនេះ ពុំមានសំឡេងនៅក្នុងរដ្ឋសភា ដូចពីអតីតកាលក៏ដោយនោះ។ ព្រះអង្គម្ចាស់ក៏ណែនាំដល់សហជីវិន សហជីវិនី របស់ព្រះអង្គឲ្យមានការខិតខំធ្វើការបំរើប្រជារាស្រ្ត និងប្រទេសជាតិបន្ថែមទៀត ក្នុងការរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិ ឲ្យកាន់តែមានការរីកចំរើនបន្ថែមទៀតនោះ។

សូមបញ្ជាក់ផងដែរថា នៅចំពោះមុខព្រះភ័ក្ររបស់ព្រះអង្គម្ចាស់ នរោត្តម ចក្រាវុធ ក្រុមការងារបោះឆ្នោត និងគណៈកម្មាធិការប្រតិបត្តិ នៃគណបក្សហ៊្វុនស៊ិនប៉ិចខេត្តកំពង់ធំ និងសមាជិកសមាជិកាគ្រប់ជាន់ថ្នាក់ទូទាំងខេត្ត បានប្តេជ្ញាគាំទ្រ ដង្ហែតាមការដឹកនាំ របស់ព្រះអង្គជាប្រធានគណបក្សហ៊្វុនស៊ិនប៉ិច ដើម្បីដឹកនាំបន្តពីព្រះបិតារបស់ព្រះអង្គ សម្តេចក្រុមព្រះ នរោត្តម រណឫទ្ធិ ឱ្យគង់វង្សជាអមតៈ ក្នុងការចូលរួមបោះឆ្នោតប្រកបដោយសក្កានុពល ជោគជ័យនាពេលអនាគតខាងមុខផងដែរ៕ អត្ថបទ៖ បាន ចក់