ប្រធានាធិបតីរបស់ប្រទេសព័រទុយហ្គាល់ បានជ្រើសរើសលោក Luis Montenegro ជាប្រមុខក្រុមកណ្ដាល-ស្ដាំនិយម គឺបក្សសម្ព័ន្ធប្រជាធិបតេយ្យ (AD) ដែលបានឈ្នះការបោះឆ្នោតជាតិ កាលពីថ្ងៃទី១៨ ខែឧសភា ធ្វើជានាយករដ្ឋមន្ត្រី កាលពីថ្ងៃព្រហស្បតិ៍ (ទី២៩ ខែឧសភា) ហើយបានស្នើឲ្យលោកបង្កើតរដ្ឋាភិបាលសំឡេងភាគតិចទី២ របស់លោក។

គណបក្ស AD ទទួលបាន ៩១អាសនៈ នៅក្នុងសភាដែលមាន ២៣០អាសនៈ ពោលគឺច្រើនជាង ១១កៅអី កាលពីនីតិកាលមុន ប៉ុន្តែនៅតែឆ្ងាយពីសំឡេងភាគច្រើនដាច់ខាត នៅក្នុងការបោះឆ្នោតមួយដែលត្រូវបានសម្គាល់ដោយការឃើញគណបក្សស្តាំនិយមជ្រុល Chega ឡើងទៅជំនួសគណបក្សសង្គមនិយម (PS) ក្នុងនាមជាកម្លាំងប្រឆាំងដ៏សំខាន់។

គួរបញ្ជាក់ថា លោក Montenegro ដែលបានឡើងកាន់អំណាចដំបូង ក្នុងខែមីនា ឆ្នាំ២០២៤ បានបដិសេធមិនឈានដល់កិច្ចព្រមព្រៀងណាមួយជាមួយក្រុមប្រឆាំងរដ្ឋាភិបាល និងប្រឆាំងអន្តោប្រវេសន៍ គឺបក្ស Chega ដែលប្រមូលបាន ៦០អាសនៈ ជាចំនួនច្រើនជាង ២ដង លើបក្ស PS ដែលទទួលបានលទ្ធផលដ៏អាក្រក់បំផុត ក្នុងរយៈពេល ៤ទសវត្សរ៍។

បន្ទាប់ពីលោក Marcelo Rebelo de Sousa បានពិគ្រោះជាមួយភាគីសំខាន់ៗចំនួន ៣ កាលពីថ្ងៃព្រហស្បតិ៍ ការិយាល័យរបស់លោកប្រធានាធិបតីរូបនេះ បានឲ្យដឹងនៅក្នុងសេចក្តីថ្លែងការណ៍ថា លោក Montenegro នឹងប្រកាសរដ្ឋាភិបាលថ្មីរបស់លោក បន្ទាប់ពីសភាបានកោះប្រជុំ សម្រាប់សម័យប្រជុំដំបូងរបស់ខ្លួន។ ការបោះឆ្នោតបញ្ជាក់មិនតម្រូវឲ្យមាននោះទេ តែភាគីណាមួយអាចបង្ហាញញត្តិបដិសេធ៕