ក្រុមឧទ្ទាមហ៊ូធីយេម៉ែននិយាយកាលពីថ្ងៃព្រហស្បតិ៍ថា ពួកគេបានបាញ់មីស៊ីលទៅលើអាកាសយានដ្ឋាន Ben Gurion របស់អ៊ីស្រាអែល ។

លោក Yahya Sarea គឺជាអ្នកនាំពាក្យក្រុមឧទ្ទាមហ៊ូធីគាំទ្រដោយអ៊ីរ៉ង់ និយាយថា ពួកគេសម្រេចបានគោលដៅរបស់ខ្លួន ដោយបង្ខំឲ្យពលរដ្ឋអ៊ីស្រាអែលរត់ទៅកាន់ទីជម្រក និងបញ្ឈប់ការគ្រប់គ្រងចរាចរណ៍អាកាសនៅអាកាសយានដ្ឋាន ។

យោធាអ៊ីស្រាអែលនិយាយនៅក្នុងសារបង្ហោះលើបណ្តាញព័ត៌មានសង្គម Telegramកាលពីព្រឹកថ្ងៃព្រហស្បតិ៍ថា មីស៊ីលបាញ់ចេញពីយេម៉ែន ត្រូវបានបាញ់ស្កាត់ ។

ការវាយប្រហារនេះ បានកើតមានឡើងរយៈពេល ១ថ្ងៃប៉ុណ្ណោះ ក្រោយអ៊ីស្រាអែលនិយាយថា ពួកគេបានវាយប្រហារគោលដៅក្រុមហ៊ូធី រួមទាំងយន្តហោះនៅសល់ ១គ្រឿងចុងក្រោយប្រើប្រាស់ដោយក្រុមមួយនេះ នៅអាកាសយានដ្ឋានអន្តរជាតិក្រុង Sanaa ក្រោយក្រុមជីវពលយេម៉ែនមួយនេះ បាញ់មីស៊ីលមកលើអ៊ីស្រាអែល កាលពីរយៈពេល ១ថ្ងៃមុន ។ 

ចាប់តាំងពីសង្រ្គាមផ្ទុះឡើងនៅតំបន់ហ្កាហ្សា កាលពីខែតុលា ឆ្នាំ ២០២៣ ក្រុមឧទ្ទាមហ៊ូធី បានវាយប្រហារអ៊ីស្រាអែល និងវាយប្រហារការដឹកជញ្ជូននៅក្នុងសមុទ្រក្រហម ដើម្បីបង្ហាញសាមគ្គីភាពជាមួយជនប៉ាឡេស្ទីន ។

ភាគច្រើននៃមីស៊ីល និងយានដ្រូនបាញ់សំដៅអ៊ីស្រាអែល ត្រូវបានបាញ់ស្កាត់ ឬធ្លាក់មុនពេលទៅដល់គោលដៅ ហើយអ៊ីស្រាអែល បានបើកការវាយប្រហារសងសឹកវិញ ៕